Мюнхеннинг “Бавария” клуби ҳимоячиси Дайот Упамеканога Испаниянинг “Реал Мадрид” жамоаси жиддий қизиқиш билдирмоқда. Журналист Флориан Плеттенбергнинг хабарига кўра, мадридликлар ҳозирча футболчи билан музокара бошлагани йўқ, бироқ у “Бавария” билан янги шартнома борасида келишувга эриша олмаса, унинг вакиллари билан алоқа ўрнатишга ҳамда уни эркин агент сифатида ўз сафига қўшиб олишга тайёр.
Манбанинг ёзишича, франциялик футболчининг агентлари ҳозирда “Бавария” раҳбарияти билан музокаралар олиб бормоқда. Клуб Упамекано билан 2030 ёки 2031-йилгача амал қиладиган янги шартнома имзолашни режалаштирган. Аввалроқ “немис машинаси” Упамеканога узоқ муддатли шартнома таклиф қилган эди, аммо бу таклиф футболчининг талабларига мос келмаган. Шу боис улар ўртасидаги музокаралар боши берк кўчага кириб қолган эди. Энди эса мюнхенликлар яхшиланган таклиф тайёрлаётгани айтилмоқда.
Шунингдек, Дайотга Англиянинг “Челси”, “Ливерпуль”, “Манчестер Юнайтед” жамоалари ҳамда Каталониянинг “Барселона” клуби ҳам жиддий қизиқиш билдирмоқда.
Маълумот учун, 27 ёшли ҳимоячи “Бавария”га 2021 йил ёзида “Лейпциг” клубидан 60 миллион евро эвазига ўтган эди. Жорий мавсумда у барча мусобақалар доирасида жами 14 та ўйинда майдонга тушган. Transfermarkt портали Упамеканонинг бозор қиймати ҳам 60 миллион еврога баҳоламоқда. Унинг клуб билан шартномаси 2026-йилга қадар амал қилади.
