Ўзбекистон ва Қозоғистон Президентлари Шавкат Мирзиёев ва Қосим-Жомарт Тўқаев бугун, 15 ноябрь куни Тошкентдаги Кўксарой қароргоҳида видеоконференция режимида қўшма лойиҳаларни ишга тушириш маросимида иштирок этди. Икки давлат раҳбарларининг матбуот хизматлари хабар берди.
Ишга тушириш учун саноат, қурилиш, нефть-газ кимёси, молия, логистика ва туризм соҳаларида умумий қиймати 1,2 млрд долларлик 7 лойиҳа тайёрланган эди.
Президентлар рамзий тугмани босиш орқали Сирдарё ва Туркестан вилоятларидаги “Марказий Осиё” Халқаро саноат кооперацияси маркази, Тошкентдаги “Tenge Bank”нинг бош офиси, Тошкент вилоятидаги кўп тармоқли логистика маркази қурилиши, Янги Тошкентдаги “Остана” тураржой мажмуаси, Қашқадарё вилоятидаги линей алкилбензол ишлаб чиқарувчи нефть-газ кимё мажмуаси, Янги Тошкентдаги “Остана” меҳмонхонаси ҳамда Қозоғистон пойтахтидаги “Тошкент” меҳмонхонаси фаолиятини бошлаб берди.
