АҚШ ҳукумати “грин карта” лотереясида иштирок этиш қоидаларини янгилашни режалаштирмоқда. Ўзгаришлар 2026 йил 10 апрелдан кучга кириши мумкин ва DV-2027 лотереясига тааллуқли бўлади. АҚШ Федерал реестрида янги қоидалар ҳақидаги маълумот эълон қилинди.
Лойиҳага кўра, Diversity Visa Program лотереясида иштирок этиш учун амалдаги хорижга чиқиш паспорти талаб этилади. Аризага паспортнинг шахсий маълумотлар ва имзо туширилган саҳифаси сканерини юклаш керак бўлади. Бундан ташқари, ариза топшириш учун 1 доллар миқдорида йиғим жорий этилади.
Яна бир ўзгариш анкетани тўлдириш вақтига тааллуқли. Ҳозир бунинг учун 30 дақиқа берилади, янги қоидаларга кўра эса вақт 90 дақиқагача узайтирилиши мумкин. Давлат департаментига кўра, ушбу чора-тадбирлар фирибгарлик аризалари сонини камайтиришга ва дастурнинг шаффофлигини оширишга қаратилган.
Шунингдек, DV дастури қоидаларида “гендер” ва “ёш” сўзлари ўрнига “биологик жинс” ва “туғилган сана” сўзларидан фойдаланиш режалаштирилган. Консулликлар учун йўриқномага “мажбур” сўзи ҳам киритилган. Бу консуллик ходимлари ариза берувчилар маълумотларини қатъий текшириши кераклигини англатади.
Лотерея ўйинлари иштирокчиларига қўйиладиган асосий талаблар ўзгаришсиз қолади. Ариза берувчилар аввалгидек қуйидагиларни бажариши керак:
- таълим даражасини кўрсатиш — ўрта маълумот тўғрисидаги шаҳодатномани ёки унинг эквивалентини;
- сўровномада оиланинг барча аъзолари ва эр-хотинни санаб ўтиш;
- консулликдаги интервью пайтидаёқ маълумотларни тасдиқлаш.
Инглиз тилини билиш талаб этилмайди ва бундай шартни жорий этиш ҳали режалаштирилмаган. Ўзгаришларнинг сабабларидан бири сифатида шубҳали аризаларнинг кўплиги кўрсатилган.
АҚШ расмийларига кўра, DV-2025 ўйини давомида 2,5 миллионга яқин шубҳали ёки такрорловчи сўровномалар аниқланган. Янги қоидалар биринчи навбатда фирибгарлик ва қайта рўйхатдан ўтишга қарши курашишга қаратилган.
Green Card — АҚШда доимий яшаш учун расмий гувоҳнома. У АҚШда чекловларсиз яшаш ва ишлаш, ижтимоий имтиёзлар олиш имконини беради ва кейинчалик фуқаролик олишга йўл очади. Лотерея ҳар йили ўтказилади. Унда АҚШга иммиграция даражаси паст бўлган мамлакатлар, жумладан, Ўзбекистон фуқаролари иштирок этиши мумкин.
Ўзбекистонликлар Green Card учун ариза топшириши мумкин, аммо виза берилмайди
АҚШнинг Ўзбекистондаги элчихонаси 2025 йил 30 декабрдан бошлаб Diversity Visa (Green Card) дастури бўйича барча визалар берилиши тўхтатиб қўйилганини эълон қилган.
“DV дастури мурожаатчилари визага ариза топшириши ва суҳбатдан ўтиши мумкин, АҚШ давлат департаменти ўз навбатида суҳбат санасини белгилашда давом этади, бироқ DV визалари берилмайди”, дейилади элчихона хабарида.
19 декабрь куни АҚШ “грин карта” дастурини вақтинча тўхтатганди. Бунга Браун университетида отишма содир этганликда гумонланган шахс ушбу дастур орқали мамлакатга келгани сабаб бўлгани айтилмоқда. 13 декабрь куни юз берган мазкур отишмада ўзбекистонлик талаба Муҳаммадазиз Умурзоқов ҳам ҳалок бўлганди.
Ҳар йили бутун дунё бўйлаб минглаб аҳоли Green Card ютиб олади ва АҚШга расман кўчиб ўтиш имкониятига эга бўлади. 2025-йилда Ўзбекистон ғолиблар сони бўйича (5,5 минг киши) биринчи ўринни эгаллаганди. Кейинги ўринларда Қирғизистон (3 минг), Тожикистон (2,9 минг) ва Қозоғистон (2 минг) бўлган.
