Хитойлик олимлар инсон умрини 150 йилгача узайтириши мумкин бўлган дори ишлаб чиққанини маълум қилди. Уларнинг бу ҳақдаги тадқиқоти “Oddity Central”да эълон қилинди.
Тадқиқот Хитойнинг Шенжен шаҳридаги Lonvi Biosciences стартапи – биотехнология ва узоқ умр кўриш бўйича тадқиқотлар билан шуғулланадиган компанияда ўтказилган. Олимлар ёши улғайган, бўлинишни тўхтатган, аммо организмда яллиғланишни давом эттирадиган зомби ҳужайраларни нишонга оладиган препарат ишлаб чиқилганини билдирган. Шунингдек, ушбу янги таблетканинг инсон умрини назарий жиҳатдан 150 йилгача узайтириш имконияти мавжудлиги айтилмоқда.
Lonvi бош директори Ип Чжу бу ишланмани “Муқаддас Граал” дея атаб, препаратнинг асосий таркибий қисми нафақат умрни узайтириши, балки организмга ҳужайра даражасида таъсир қилиб, ёш билан боғлиқ касалликлар хавфини ҳам камайтириши мумкинлигини айтган.
Шунингдек, компаниянинг техник директори Лю Цинхуа эса “150 йилгача яшаш аниқ”лигини, яқин йилларда бундай технологиялар кундалик ҳаётнинг бир қисмига айланиши эҳтимолини билдирган.
Қайд этилишича, Lonvi ишлаб чиққан препарат C1 (PCC1) – узум уруғидан олинган молекулага асосланган. Бу модда аввалроқ лаборатория кемирувчиларининг умрини узайтириш қобилиятини кўрсатган. Компания маълумотига кўра, PCC1’ни еган сичқонлар ўртача 9,4% кўпроқ яшаган, агар жараён туғилган кундан бошланса, умр давомийлиги 64,2% га ошган.
