Олимлар лазер технологияси ёрдамида деярли бир зумда қувватланувчи квант батареяси прототипини муваффақиятли яратганини маълум қилди.
Тадқиқотчиларнинг таъкидлашича, ушбу технологиянинг энг муҳим афзалликларидан бири унинг юқори энергия сақлаш имконияти ҳисобланади.
The Guardian нашрига берган интервьюсида тадқиқот раҳбари, австралиялик олим James Quach бундай батареялар келажакда тижорат мақсадларида қўлланилса, атиги бир дақиқа ичида тўлиқ қувватланиши ва қурилмаларни йиллар давомида энергия билан таъминлаш имкониятига эга бўлиши мумкинлигини айтган.
Мутахассислар фикрича, квант батареялари симсиз қувватлаш технологияларини янги босқичга олиб чиқиши мумкин.
Лазер орқали қувват узатиш технологияси кабеллар ва анъанавий қувватлаш қурилмаларига бўлган эҳтиёжни сезиларли даражада камайтириши кутилмоқда. Масалан, келажакда дронлар парвоз вақтида масофадан туриб қувватланиши ёки электромобиллар махсус станцияларда тўхтамасдан ҳаракатланиш давомида энергия олиши мумкин.
Ҳозирча яратилган миниатюра прототип электр энергиясини фақат миллиарддан бир неча улуш сония давомида сақлай олади. Бироқ олимлар бу натижани квант назариясини амалий технологияга татбиқ этиш йўлидаги муҳим қадам сифатида баҳоламоқда.
Шунингдек, 2025 йилда University of Oxford олимлари квант компьютерлари ўртасида маълумотларни юқори тезликда узатиш бўйича муҳим натижаларга эришган эди. Мутахассислар фикрича, квант батареяларининг ривожланиши инсонiyatни симларга боғлиқ бўлмаган янги технологиялар даврига яқинлаштириши мумкин.
