Ўзбекистонда электромобилда такси хизматини кўрсатувчи фуқаролар учун янги имтиёзлар жорий этилиши режалаштирилмоқда. Бу “ ‘Маҳаллани ривожлантириш ва жамиятни юксалтириш’ йилида устувор йўналишлар бўйича ислоҳотлар дастурлари ва ‘Ўзбекистон — 2030’ стратегиясини амалга ошириш бўйича давлат дастури тўғрисида”ги президент фармони лойиҳасида кўзда тутилган.
Лойиҳага кўра, ўзини ўзи банд қилган фуқаро сифатида рўйхатдан ўтиб, электромобилда такси хизматини кўрсатувчи шахсларга бир қатор енгилликлар берилади. Хусусан, белгиланган ижтимоий солиқни тўлашда 30 фоизгача чегирма жорий этилади. Шунингдек, давлат ташкилотларига тегишли бўлган, жумладан, аэропорт ва вокзаллардаги пулли автотураргоҳлардан 30 дақиқагача бепул фойдаланишга рухсат берилиши назарда тутилган.
Бундан ташқари, йўл-транспорт ҳодисаси ёки ҳуқуқбузарлик содир этмасдан камида 1 миллион километр масофада такси хизматини кўрсатган фуқароларга “Табиат ҳимоячиси” кўкрак нишони бериш амалиёти йўлга қўйилади. Мазкур чора-тадбирлар экологик тоза транспорт воситаларидан фойдаланишни рағбатлантиришга қаратилган.
Фармон лойиҳасида қайд этилишича, ушбу имтиёзлар 2026 йил 1 мартдан кучга кириши режалаштирилган. Масъул органлар сифатида Транспорт вазирлиги, Экология ва иқлим ўзгариши миллий қўмитаси, шунингдек, Қорақалпоғистон Республикаси Вазирлар Кенгаши ҳамда вилоятлар ва Тошкент шаҳар ҳокимликлари белгиланган.
Кутилишича, мазкур чора-тадбирлар натижасида электромобилда такси хизматини кўрсатувчи ўзини ўзи банд қилган фуқаролар сони 300 минг нафарга етади. Шу билан бирга, енгил двигателли автомобилларнинг атмосфера ҳавосини ифлослантиришдаги улуши 7 фоизга камайтирилади.
