Жорий йилнинг 1 сентябридан Ҳиндистон фуқаролари айрим давлатларнинг амалдаги кўп марталик бизнес ёки туризм визасига эга бўлса, Ўзбекистонга 30 кунгача визасиз кириши мумкин. Бу ҳақда Президентнинг жорий йилнинг 29 августдаги “Халқаро тан олинган визаларга эга бўлган хорижий фуқаролар учун Ўзбекистон Республикасига кириш тартибини соддалаштириш тўғрисида”ги ПФ–180-сонли фармонида белгиланди.
Янги тартибга кўра, визасиз режимдан фойдаланиш учун Ҳиндистон фуқароларида Австралия, АҚШ, Буюк Британия ва Шимолий Ирландия Бирлашган Қироллиги, Канада, Жанубий Корея, Шенген келишуви иштирокчилари бўлган давлатлар, Янги Зеландия ёки Япониянинг амалдаги кўп марталик бизнес ёки туризм визаси бўлиши керак.
Шунингдек, фуқаро ўз мамлакатига ёки учинчи давлатга учиш учун авиачипта тақдим этиши лозим.
Мазкур визалардан бирининг амал қилиш муддати давомида Ўзбекистонга кирган Ҳиндистон фуқароларига 30 кунгача визасиз қолиш ҳуқуқи берилади.
Фармон 2026 йил 29 августда қабул қилинган бўлиб, 1 сентябрдан кучга кирган.
