Тошкентда фуқародан уни жавобгарликка тортмаслик учун пул талаб қилган инспектор қўлга олинди. Бу ҳақда Ички ишлар вазирлиги хабар қилди.
Қайд этилишича, фуқаро ариза билан мурожаат қилиб, Яккасарой тумани ички ишлар органлари фаолиятини мувофиқлаштириш бошқармасида профилактика инспектори бўлиб ишлайдиган Санжар исмли шахс жавобгарликка тортмаслик эвазига 400 доллар пул талаб қилаётганини билдирган.
Ўтказилган тезкор тадбирда ушбу ходим келишилган пулларни олган вақтида қўлга тушди.
Ҳолат юзасидан инспекторга нисбатан Жиноят кодекси 210-моддасининг тегишли қисми билан иш очилиб, тергов ҳаракатлари олиб борилмоқда.
