Тожикистоннинг Хатлон вилояти Шамсиддин Шоҳин туманидаги Лангардара ҳудудида тожикистонлик археологлар Қадимги Хуттал марказларидан бири ҳисобланган ўрта асрларга оид Андичарог шаҳри харобаларини топди. Бу ҳақда “Asia-Plus” хабар берди.
Тожикистон ҳукумати ҳузуридаги Тарихий ва маданий меросни муҳофаза қилиш агентлиги раҳбари Шерали Хўжазоданинг сўзларига кўра, қадимий шаҳарнинг марказий қисми майдони тахминан 14 гектарни ташкил этади.
Қазишмалар натижасида ҳунармандчилик ривожини акс эттирувчи юздан ортиқ артефакт топилди: кулолчилик ва темирчиликдан ёғоч ўймакорлиги ва танга зарб этишгача.
Топилмалар орасида қадимий тангалар, қўл ва сув тегирмон тошлари, юқори ишлов бериш даражаси билан ажралиб турадиган ёғоч конструкция элементлари мавжуд.
Тарихий манбаларда қайд этилишича, Андичарог Панж дарёсининг ўнг қирғоғида, Варвалак (Варвализ) тоғи этагида, ҳозирги Мўминобод ва Шамсиддин Шоҳин туманлари чегарасида жойлашган.
Археологлар, шунингдек, қадимий мадрасанинг парчаларини ҳам топди, унда ўйилган устунлар ва безак ҳамда ёзувлар билан безатилган элементлар сақланиб қолган. Асосий бинонинг баландлиги олти метрга етгани айтилади, бу мураккаб шаҳарсозлик ва юқори даражадаги бадиий маҳоратдан далолат беради.
Хўжазоданинг сўзларига кўра, янги топилмалар Тожикистон цивилизациясининг моддий маданияти бойлигини кўрсатади ва минтақадаги археологик кашфиётлар занжирини давом эттиради.
“Тарихий обидаларни тиклаш нафақат илмий иш, балки маънавий миссия ҳамдир. Президентимиз Имомали Раҳмоннинг эътибори ва қўллаб-қувватлаши туфайли биз тарихнинг унутилган саҳифаларини ҳаётга қайтаряпмиз, миллий ғурур ва ўтмишга ҳурмат туйғуларини мустаҳкамлаяпмиз”, деди у.
Қадимги Хуттал обидалари аввалроқ UNESCO’нинг Бутунжаҳон мероси рўйхатига киритилган бўлиб, бу уларнинг жаҳон маданияти учун аҳамиятини таъкидлаган.
