Таиланднинг Нонтҳабури провинциясида кремация (жасадни ёқиш) учун олиб келинган 65 ёшли аёл тобут ичида тирилди. Кейинчалик маълум бўлишича, аёлга “ўлган” деб нотоғри ташхис қўйилган. Бу ҳақда “Al Jazeera” хабар берди.
Хабарга кўра, ибодатхона ходимлари тобут ичидан заиф тақиллаш овозини эшитиб қолган.
“Мен улардан тобутни очишни сўрадим ва ҳамма ҳайратда қолди. Аёлнинг кўзлари бироз очиқ эди, у тобутни тақиллатган. Эҳтимол, у анчадан бери шундай ётгандир”, деб ҳолатга изоҳ берган ибодатхона расмийси.
Аёлнинг акаси айтишича, синглиси икки йил давомида тўшакда ётган, соғлиғи ёмонлашган ва икки кун олдин нафас олмаётгандек кўринган. Шундан сўнг у аёлни тобутга солиб, Бангкокдаги шифохонага донорлик учун олиб келган. Аммо шифохона ўлим ҳақидаги расмий гувоҳнома бўлмагани сабабли донорликни қабул қилмаган.
Шундан кейин у ибодатхонага мурожаат қилган, бироқ ҳужжатлар йўқлиги боис бу ерда ҳам кремация амалга оширилмаган.
Ибодатхона ходими эркакка ўлим гувоҳномасини олиш тартибини тушунтираётган пайтда тобут ичидан тақиллаш овози эшитилган ва аёл зудлик билан касалхонага юборилган. Шифокорлар унга оғир гипогликемия – қондаги қанд миқдорининг кескин пасайиши ташхисини қўйиб, аёлнинг юрак ва нафас олиш фаолияти аслида тўхтамаганини тасдиқлаган.
Қайд этилишича, ибодатхона аёлнинг тиббий харажатларини ўз зиммасига олган.
