Хорватия парламенти 24 октябрь куни мамлакатда мажбурий ҳарбий хизматни тиклаш тўғрисидаги қонун лойиҳасини маъқуллади ва армияга чақирув эълон қилди. Бу ҳақда The Independent хабар берди.
Қонун Россиянинг Украинадаги ҳарбий ҳаракатлари ортидан кучайган хавфсизлик хавотирлари, шунингдек Болқон минтақасида қуролланиш ва армияни кенгайтириш жараёнлари фонида қабул қилинмоқда. Маълумотларга кўра, 2007-йилда туғилганлар йил охиригача тиббий кўрикдан ўтишга чақирилади ва уларга ойлик маош тайинланади.
Мазкур қарорга 151 нафар депутатдан 84 нафари “ҳа”, 11 нафари “йўқ” деб овоз берган, 30 киши эса бетараф қолди. Маълумотларга кўра, икки ой давом этадиган бу хизмат ёшлар учун “асосий ҳарбий тайёргарлик” курси сифатида ўтказилади. Мамлакатда 2008-йилда кўнгиллилик асосидаги армия тизимига ўтилган эди.
“Мақсад — ёшларни инқироз ҳолатларида керак бўладиган билим ва кўникмаларга ўргатиш. Улар миллий хавфсизликни таъминлашга ўз ҳиссасини қўшиши керак”, дейилади Хорватия Мудофаа вазирлиги баёнотида.
Хорватияда июль ойида 1991–1995-йиллардаги уруш ғалабасига бағишланган йирик ҳарбий парад ўтказилган эди. Мамлакатнинг мазкур урушдаги рақиби Сербия билан муносабатлари эса ҳануз таранглигича қолмоқда.
