Россия юқори технологияли қуролларни керакли деталлар билан таъминлаш учун ўз электрон компонентлар базасини ишлаб чиқаришни ривожлантириши зарур. Бу ҳақда Россия президенти Владимир Путин маълум қилди.
“Қуролларнинг замонавий ва айниқса истиқболли турлари электрон компонентлар базасининг самарадорлигига тобора кўпроқ талаб қўймоқда. Кўриниб турибдики, Россия армияси ўзимиз ишлаб чиққан ‘ақлли’ техника билан жиҳозланиши керак”, деди Путин маҳаллий интеграл электроникани ривожлантириш бўйича йиғилишда.
У мисол сифатида АҚШ, Хитой ва Европа Иттифоқи давлатларини келтириб, улар бу соҳада “суверенитетни мустаҳкамлаш” ва хорижий етказиб берувчиларга қарамликни камайтиришга интилаётганини таъкидлади.
“Барчага мутлақо аён: иқтисодий ва технологик ривожланишни, сунъий интеллект, космос, алоқа, рақамли технологиялар, квант ҳисоблаш соҳаларида технологик етакчиликни таъминлаш нафақат қийин, балки рақобатбардош интеграл схемалар ва электрон компонентлар базасисиз имконсиз”, дея таъкидлади Путин.
Бироқ санкцияларга қарамай, Россия ўз қуролларида, жумладан Украинага зарба беришда қўлланилаётган ракеталарда хорижий компонентлардан фойдаланишда давом этмоқда. Киев бу ҳақда бир неча бор ракета қолдиқларини ўрганиш асосида маълум қилган.
2025 йил октябрь ойида оммавий ҳаво ҳужумларидан биридан сўнг Украина президенти Владимир Зеленский Россиянинг 549 та ҳужум воситасида АҚШ, Хитой, Тайван, Буюк Британия, Германия, Швейцария, Япония, Корея ва Нидерландия компаниялари томонидан ишлаб чиқарилган 102 785 та хорижий бутловчи қисмлар аниқланганини айтган. Хусусан, зарба берувчи дронларда 100 мингдан ортиқ компонентлар аниқланган. Улардан 1,5 мингга яқини “Искандер“, 405 таси “Калибра” ва 192 таси “Кинжал” ракеталарида топилган.
