Ҳиндистоннинг бир қатор ҳудудларида кузатилган кучли ёмғир, бўрон ва чақмоқ чақиши оқибатида камида 28 киши ҳалок бўлди. Бу ҳақда Hindustan Times нашри хабар берди.
Маълумотларга кўра, мамлакатнинг турли штатларида кузатилган ноқулай об-ҳаво шароити аҳоли ҳаётига жиддий таъсир кўрсатган.
Энг кўп талафот Уттар Прадеш штатида қайд этилган. Бу ерда икки киши чақмоқ уриши оқибатида ҳалок бўлган. Яна уч киши кучли шамол туфайли уй устига дарахт қулаши оқибатида вафот этган. Қурилиши давом этаётган кўприкнинг қулаб тушиши эса олти кишининг ҳаётига зомин бўлган.
Бўрон оқибатида кўплаб ҳайвонлар нобуд бўлган, айрим бинолар ва инфратузилма объектларига ҳам зарар етган.
Ғарбий Бенгалия ва Бихар штатларида эса кучли шамол ҳамда чақмоқ уриши оқибатида етти нафардан киши ҳалок бўлган.
Мадхя Прадеш штатида кучли ёмғир сабаб уч киши вафот этган, яна икки киши жароҳатланган.
Метеорологлар Ҳиндистон шимолидаги айрим ҳудудларда ноқулай об-ҳаво шароити яқин кунларда ҳам сақланиб қолиши мумкинлигидан огоҳлантирмоқда.
