Кеча, 10 июнь куни Андижон вилоятининг Марҳамат туманида жойлашган тиббиёт бирлашмаси ҳудудида 4 ходим бункердаги газдан заҳарланиб вафот этди. Бу ҳақда Бош прокуратура матбуот котиби Ҳаёт Шамсутдинов хабар берди.
Дастлабки маълумотларга кўра, бирлашма ходимлари оқова ва чиқинди сувлар тўпланадиган бункерни тозалаш ва таъмирлаш мақсадида унинг ичига тушган ҳамда шу вақтда ичкаридаги заҳарли газ таъсирида ҳушини йўқотиб, суюқ чиқинди ичига тушиб кетган ҳамда воқеа жойида вафот этган.
Ҳодиса ҳақида туман тиббиёт бирлашмаси шифокори томонидан 102 қисқа рақамига хабар берилган. Тезкор қутқарув хизматлари етиб келиб, барчанинг жасадларини бункер ичидан олиб чиққан.
Суд-тиббий экспертизасининг дастлабки хулосасига кўра, марҳумларда водород сульфид газидан ўткир заҳарланиш, ўпка эмфиземаси ҳамда нафас йўлларининг суюқлик билан тўсилиши оқибатида келиб чиққан механик асфиксия аниқланган.
Ҳодиса юзасидан Марҳамат туман ИИБ томонидан Жиноят кодексининг 257-моддаси (Меҳнатни муҳофаза қилиш қоидаларини бузиш) 2-қисми “а” банди билан жиноят иши қўзғатилган.
Марҳумлар: 1989, 1969, 1972 ва 1967 йилларда туғилган Марҳамат тумани фуқаролари бўлиб, улар турли лавозимларда тиббиёт бирлашмасида ишлаган.
Ҳозирда барча ҳолат бўйича тергов ва қўшимча экспертизалар давом этмоқда.
