Японияда эркак йиллик мукофоти камайгани сабаб бошлиғини ўлдирди. 44 ёшли Акихиро Кавасима 9 январь куни Токиодаги квартирасида ҳаёт аломатисиз топилган. Унга номаълум шахс томонидан ўн маротаба пичоқ билан зарба берилгани аниқланган. Кузатув камераларидаги ёзувларга кўра, квартирага охирги бўлиб кирган шахс унинг 45 ёшли қўл остидаги ходими Масахиро Яманака бўлган. Орадан кўп ўтмай, у қўлга олинган.
Кавасиманинг уйидан ҳисоб-китоб варақаси топилган. Ҳужжатга кўра, декабрь ойида Яманакага берилиши керак бўлган йиллик мукофот бир ярим ойлик маош ўрнига фақат бир ойлик миқдорида белгиланган. Тергов жараёнида ҳибсга олинган шахс раҳбаридан ва мукофот миқдорининг камайтирилганидан норози бўлиб келгани аниқланган.
“Мен гап билан кўндириш иш бермаётганини тушундим ва унинг фикрини бошқа йўл билан ўзгартиришга қарор қилдим. Ҳатто бу унга азоб берса ҳам”, деган Яманака.
Журналистлар аниқлашича, Кавасима ва Яманака мактаб давридан дўст бўлган, баъзан ишга бирга қатнаб юрган. Кавасима бир неча йил аввал Яманакани ўз компаниясига ишга таклиф қилган ва ундан жамоа билан раҳбарият ўртасидаги муносабатларни яхшилашда ёрдам беришини кутган. Бунгача Яманака реклама соҳасида фаолият юритган, бироқ болаликдаги дўсти унга яхшироқ шартлар таклиф қилган.
Яманаканинг онаси ўғлининг қилмиши учун узр сўради. 72 ёшли аёл унинг қувноқ инсон бўлганини ва зўравонликни ёқтирмаганини айтган.
