Қашқадарё вилоятининг Қамаши туманидаги оилавий нодавлат мактабгача таълим ташкилотида 3 ёшли бола вафот этди. Бу ҳақда Мактабгача ва мактаб таълими вазирлиги матбуот котиби Дилфуза Собирова хабар берди.
Маълум қилинишича, туман ҳудудидаги “Зафар” МФЙда фаолият юритган якка тартибдаги тадбиркор О.А.га тегишли оилавий нодавлат мактабгача таълим ташкилотида 3 ёшли тарбияланувчи транспорт воситасида унутиб қолдирилгани сабабли вафот этган.
Мазкур таълим ташкилоти раҳбарияти ва масъул ходимлари болаларни автотранспорт воситаларида ташиш қоидалари ва талабларига қатъий риоя этиш бўйича тегишли ташкилотлар томонидан доимий огоҳлантириб келинган, аммо мазкур талаб ва мажбуриятларга амал қилинмаганлиги сабабли жорий йилнинг 4 июнь куни муассасага қатновчи тарбияланувчилардан бири транспорт воситасида қолдириб кетилган ҳамда муассаса ходимларининг совуққонлиги ва эътиборсизлиги оқибатида автотранспорт ичида вафот этган.
Ҳозирда ушбу ҳолат юзасидан тегишли ҳуқуқни муҳофаза қилувчи органлар томонидан жиноят иши қўзғатилиб, тергов ҳаракатлари олиб борилмоқда. Шунингдек, якка тартибдаги тадбиркор О. А. билан тузилган тегишли битим ҳужжатлари бекор қилинган.
“Мактабгача ва мактаб таълими вазирлиги марҳума тарбияланувчининг оила аъзолари ва яқинларига чуқур ҳамдардлик билдиради ҳамда вазиятга дахлдор бўлган барча масъулларга қатъий чора кўришилишини маълум қилади”, дейилади хабарда.
