Хоразм вилояти Боғот туманида овқатдан заҳарланиш оқибатида бир оиланинг тўрт аъзоси — она ва унинг уч нафар вояга етмаган қизи вафот этди. Бу ҳақда Бош прокуратура матбуот котиби маълум қилди.
Маълум бўлишича, улар уйда тайёрланган ва бир кун аввалги кундан қолган салатни истеъмол қилган. Дастлабки маълумотларга кўра, оила аъзолари 8 октябрь куни аввалги кунги туғилган кун тадбиридан қолган озиқ-овқат маҳсулотларини истеъмол қилган, шундан сўнг уларда заҳарланиш аломатлари кузатилган.
“Kun.uz”нинг маҳалла раисига таяниб ёзишича, фожиадан бир кун олдин оилада туғилган кун нишонланган. Эртаси куни аёл қизлари билан тадбирдан қолган салатни истеъмол қилган. Бу пайтда унинг турмуш ўртоғи уйда бўлмаган. Салатларни аёлнинг ўзи тайёрлаган.
Вафот этган қизларнинг энг каттаси 7 ёш бўлгани айтилмоқда. Оилада уч қиздан бошқа фарзанд бўлмаган.
Фуқароларнинг вафоти сабабларига аниқлик киритиш мақсадида суд-тиббий экспертизаси тайинланган. Текширувга вилоят ФВБ, ССБ ва Санитария-эпидемиологик осойишталик ва жамоат саломатлиги хизмати мутахассислари жалб этилган.
Ҳолат юзасидан 10 октябрь куни Жиноят кодексининг 276−11-моддаси 4-қисми “а” банди (Истеъмолчиларнинг ҳаёти ёки соғлиғи хавфсизлиги талабларига жавоб бермайдиган товарларни ўтказиш мақсадини кўзлаб ишлаб чиқариш, сақлаш, ташиш ёхуд ўтказиш, ишлар бажариш ёки хизматлар кўрсатиш одамлар ўлимига сабаб бўлиши) билан жиноят иши қўзғатилган.
Ҳозирда тергов ҳаракатлари давом эттирилмоқда.
