АҚШ Иммиграция ва божхона хизмати (ICE) ходимлари 24 январь куни Миннеаполис шаҳрида эркакни отиб ўлдирди. Бу ҳақда CNN хабар берди.
АҚШ Ички хавфсизлик вазирлигига кўра, эркак полициячиларга тўппонча билан яқинлашган. Натижада федерал ходим “ўзини ҳимоя қилиш” мақсадида унга ўқ узган. Ҳодиса депортация бўйича операция вақтида юз берган. Дастлаб федерал ходимлар эркакни қуролсизлантиришга уринган, бироқ у “куч билан қаршилик кўрсатган”.
“Шундан сўнг полициячи ўз ҳаёти, шунингдек, бошқа полициячиларнинг ҳаёти ва хавфсизлигидан қўрқиб ўт очган”, дейилади расмий баёнотда.
Вазирлик эркакка тегишли экани тахмин қилинаётган 9 мм калибрли ярим автоматик тўппонча тасвирланган суратни ҳам эълон қилди. Ҳодиса амалдаги яшаш рухсатномасига эга бўлмаган, тан жароҳати етказиш билан боғлиқ иш бўйича қидирувда бўлган “мигрантни қўлга олиш чоғида” юз берган.
Миннесота губернатори федерал офицерларни штатдан олиб чиқишни талаб қилди
Миннесота штати губернатори Тим Уолц федерал ходимлар томонидан содир этилган отишмани қоралади. “Бу жирканч ҳолат”, деб ёзди у X (собиқ Twitter) ижтимоий тармоғидаги саҳифасида. Шунингдек, губернатор АҚШ президенти Дональд Трампдан хорижлик фуқароларни депортация қилишда федерал полициядан фойдаланишни тўхтатишни талаб қилди.
“Миннесотадан минглаб шафқатсиз, тайёргарликка эга бўлмаган полициячиларни олиб ташланг. Зудлик билан”, деди у.
Миннеаполис полицияси бошлиғи Брайан O’Харанинг маълум қилишича, ҳалок бўлган шахс 37 ёшли АҚШ фуқароси экани тахмин қилинмоқда. Отишмадан сўнг воқеа жойида ғазабланган оломон тўпланиб, федерал офицерларни “қўрқоқлар” деб ҳақорат қилиб, шаҳарни тарк этишни талаб қилган.
Трамп операцияни қўллаб-қувватлади
АҚШ президенти Миннеаполисда ICE ходимлари томонидан эркакнинг ўлдирилиши юзасидан баёнот берди ва “ўзини ҳимоя қилган” федерал агентларни қўллаб-қувватлаб, Миннесота штати ҳокимиятини айблади.
У федерал агентларга “маҳаллий полиция ёрдам бермаганидан сўнг ICE ходимлари ўзларини қуролланган шахсдан ҳимоя қилишга мажбур бўлгани”ни айтди. Шунингдек, маҳаллий раҳбарларни “жамоатчилик тинчлигини бузиш ва федерал агентларга қарши норозиликни қўзғатиш”да айблади.
Бу федерал ходимлар рейдлар чоғида одам ўлимига сабаб бўлган илк ҳолат эмас
Жумладан, 7 январь куни Миннеаполис шаҳрида 37 ёшли аёл отиб ўлдирилганди. Расмийлар воқеани ўзини ҳимоя қилиш ҳаракати деб баҳолаган бўлса-да, шаҳар мэри буни “эҳтиётсизлик” деб атаган.
АҚШ Ички хавфсизлик вазирлиги ҳалок бўлган аёл Рени Никол Гуд эканини, у иммиграция ходимларини “машинаси билан босиб кетишга урингани”ни даъво қилди. Бироқ Миннеаполис мэри Жейкоб Фрей бунга қарши чиқди.
У буни “хизмат ваколатидан эҳтиётсиз фойдаланиш” эканини айтиб, оқибатда бир инсон ҳалок бўлганини таъкидлади. Мэр ҳақоратли сўзлар билан иммиграция ходимларини шаҳарни тарк этишга чақирди. Аммо АҚШ ички хавфсизлик вазири Кристи Ноэм рейдлар давом этиши, иммиграция ходимлари ҳеч қаерга кетмаслигини айтди.
