АҚШга ноқонуний иммиграцияни ташкил этишда кўмаклашаётган Ўзбекистон фуқароларига виза чекловлари жорий этилди. Бу ҳақда АҚШ Давлат департаменти хабар берди.
Ушбу чора Ўзбекистонда жойлашган иккита виза хизматлари компаниясининг раҳбарлари ва юқори лавозимли ходимларига қўлланилади. Улар асосан АҚШга ноқонуний келмоқчи бўлган шахслар учун саёҳат хизматларини ташкил этган.
Чекловлар АҚШ Иммиграция ва фуқаролик тўғрисидаги қонуннинг 212 (а) (3) (C) бўлимига мувофиқ амалга оширилади. Бу модда фаолияти АҚШ ташқи сиёсатига жиддий салбий таъсир кўрсатиши мумкин бўлган шахсларнинг мамлакатга киришини тақиқлайди.
Текширувларга кўра, Ўзбекистондаги айрим шахслар Қўшма Штатларга ноқонуний иммиграция қилишни мақсад қилган чет эл фуқаролари, жумладан вояга етмаганларни аэропортлар ҳамда чегаралар орқали Марказий Америкадаги транзит манзилларга етказиш ишларини мувофиқлаштирган. Кейинчалик, уларнинг кўпчилиги АҚШ ҳудудига ноқонуний киришга уринган вақтида қўлга олинган.
“Қўшма Штатлар ўз миллий хавфсизлиги ёки иммиграция қонунларига путур етказишга бўлган ҳар қандай уринишга тоқат қилмайди. Департамент ноқонуний иммиграциядан фойда кўраётганларнинг жавобгарликка тортилишини таъминлайди ва биз чегараларимиз ҳамда миллий хавфсизлигимизни ҳимоя қилиш учун одам савдоси тармоқларига қарши кескин кураш олиб борамиз”, дейилади Давлат департаменти баёнотида.
АҚШ ноқонуний иммиграцияга кўмаклашувчи жиноий тармоқларга қарши курашдаги ҳамкорлиги Ўзбекистон ҳукуматига миннатдорлик билдирди.
