АҚШ президенти Дональд Трамп мамлакатнинг 66 та халқаро ташкилотдан чиқиши тўғрисидаги меморандумни имзолади. Бу ҳақда Оқ уй матбуот хизмати хабар берди.
Ушбу ташкилотларнинг 31 таси БМТ тузилмалари ҳисобланади. Қолган 35 таси эса ушбу халқаро ташкилотга кирмайди. Оқ уй баёнотига кўра, уларнинг барчаси “энди АҚШ манфаатларига хизмат қилмайди”. Трамп маъмурияти АҚШ аъзо бўлган ёки молиялаштирадиган барча халқаро ташкилотлар, конвенциялар ва шартномаларни текширгандан сўнг шундай қарорга келган.
- АҚШ қайси халқаро ташкилотлардан чиқмоқда?
Мазкур ташкилотларнинг тўлиқ рўйхати Оқ уй расмий сайтида эълон қилинган. Улар орасида оммавий қирғин қуролларининг тарқалишини олдини олишга кўмаклашиш мақсадида ташкил этилган Украина илмий-технологик маркази (UNTC), Венеция комиссияси, БМТ бош котибининг болаларга нисбатан зўравонлик масалалари бўйича махсус вакили офиси, БМТ Демократия жамғармаси ва бошқа тузилмалар бор.
АҚШ давлат котиби Марко Рубионинг баёнотида айтилишича, Трамп маъмурияти аъзолиги тўхтатилаётган ташкилотларни “маблағларни исроф қилувчи”, “самарасиз”, “зарарли”, “ёмон бошқариладиган”, “ортиқча” ёки “АҚШнинг давлат суверенитети, эркинликлари ва умумий фаровонлигига таҳдид солувчи” тузилмалар деб баҳолаган.
