АҚШ Эрон ҳудудига зарбалар беришда илк бор Эроннинг Shahed-136 дронига ўхшаш, унинг Америка талқини ҳисобланган ва Starlink сунъий йўлдош терминаллари билан жиҳозланган янги LUCAS дронларидан фойдаланди.
АҚШ Марказий қўмондонлиги эълон қилган суратларда дронлар фюзеляжининг юқори қисмида тўртбурчак панеллар кўриниб турибди. Экспертлар уларни Starlink терминаллари деб атамоқда. LUCAS концептуал жиҳатдан Эрон камикадзе дронларига ўхшайди. Кўплаб экспертлар уни “тескари муҳандислик”, яъни қўлга киритилган намуналардан ўрганиш асосида яратилган “лицензиясиз нусха” деб атамоқда.
Қурилма ўхшаш аэродинамик схемага, ички ёнув двигательига ва орқа қисмида жойлашган винтга эга. LUCAS дронлари Эронга қарши операцияда илк бор қўлланмоқда. Конструкцияда Starlink терминалларидан фойдаланилганига расмий изоҳ берилмаган. Аммо Яқин Шарқдаги можаро фонида АҚШ дронининг Ироқда ҳалокатга учраганига оид маълумот тарқалган.
Дронларни сунъий йўлдош алоқаси билан жиҳозлаш операторларга уларни парвоз давомида бошқариш имконини беради. Сунъий йўлдош сигналини узиб қўйиш қийин, дрон эса радарлар аниқламаслиги учун ерга яқин паст баландликда учиши мумкин. Бу эса уни тутиб олишни қийинлаштиради.
АҚШдаги синовлар давомида нишонларни автоматик аниқлаш тизими ҳақида ҳам сўз борган, бу эса аппаратнинг аниқлиги ва мустақил ҳаракатланиш имкониятини оширади. Жанг майдонида Starlink терминаллари ўрнатилган дронлардан фойдаланиш янгилик эмас. Аввалроқ бу тактикани Россия Украинага қарши урушда фаол қўллаган эди.
