Покистон кучлари Афғонистондаги Баграм авиабазасига ҳаводан зарбалар берди. Маълумотни сунъий йўлдош тасвирлари ва расмий манбалар тасдиқлади. Бу ҳақда The New York Times хабар берди.
Покистон томони базадаги ҳарбий техника ва омборларни нишонга олган. Мақсад афғон ҳарбий салоҳиятини заифлаштириш ҳамда “Таҳрики Толибон Покистон” жангариларига кўрсатилаётган ёрдамни тўхтатиш ҳисобланади. Гувоҳлар база яқинида портлаш овозларини эшитган.
АҚШ 2021 йилда Афғонистондан қўшинларини олиб чиққач, Баграм базаси “Толибон” назоратига ўтди. АҚШ президенти Дональд Трамп бир неча бор базани қайтариб олиш тарафдори эканини айтган. Афғонистон расмийлари эса объект топширилмаслигини маълум қилган.
Сунъий йўлдош тасвирларига кўра, базанинг шимолий қисмида камида битта самолёт ангари ва иккита йирик омборхона вайрон қилинган. Ҳужум якшанба куни соат 06:00 атрофида содир бўлган. Маҳаллий аҳоли камида иккита кучли портлаш ва қирувчи самолёт овозини эшитганини айтди.
Покистон Афғонистонни ўз ҳудудида “Таҳрики Толибон Покистон” жангариларига бошпана беришда айбламоқда. Ушбу гуруҳ йиллар давомида Покистон хавфсизлик кучларига қарши ҳужумлар уюштириб келади.
Баграм Кобулдан қарийб 40 километр шимолда жойлашган бўлиб, 20 йил давомида АҚШ ҳарбийларининг Афғонистондаги асосий маркази ва энг йирик базаси вазифасини ўтаган. Сўнгги бир ҳафта ичида Покистон Афғонистонга 50 дан ортиқ авиазарбалар берди. Афғонистон ҳукумати айрим ҳужумлар оқибатида тинч аҳоли орасида қурбонлар борлигини таъкидлади.
Баграм атрофида яшовчи аҳоли тинчлик тарафдори эканини, бироқ ҳужумлар давом этса, ўз юртини ҳимоя қилишга мажбур бўлишини айтмоқда.
Афғонистон Мудофаа вазирлиги 1 март куни Покистондан ҳаво ҳужумлари амалга оширилгани ҳақида баёнот берган, бироқ нишонга олинган объект номи очиқланмаган. “Толибон” ҳар йили август ойида базада ҳарбий арсенал намойиши ва парад ўтказиб келади.
