Ҳиндистон ва Покистон ҳарбий кемалари денгизда тўқнашиб кетди. Ҳодиса ортидан Нью Деҳли Покистоннинг мамлакатдаги бош дипломатини чақиртирди. Бу ҳақда Reuters хабар берди.
Дипломатнинг чақиртирилиши Покистон ҳарбий-денгиз кучларининг номақбул ва нопрофессионал хатти-ҳаракатлари билан изоҳланган. У орқали Покистон ҳукуматига расмий норозилик билдирилган.
Бу ядровий қуролга эга қўшнилар ўртасида 2025 йилдаги тўрт кунлик ҳарбий тўқнашувдан бери юзага келган биринчи очиқ ҳарбий кескинликдир. Кемалар тўқнашуви халқаро сувларда содир бўлган.
Ҳиндистон манбаларига кўра, 15 сентябрь куни Арабистон денгизининг шимолий қисмида Покистон ҳарбий кемаси мунтазам кузатув миссиясини бажараётган Ҳиндистон кемасига юқори тезликда яқинлашган ва тўқнашув келиб чиққан.
“Зарба ҳеч қандай жиддий талофот етказмади. Аммо Покистоннинг хатти-ҳаракати икки давлат ўртасидаги ҳарбий машқлар, манёврлар ва қўшинлар ҳаракатини тартибга солувчи 1991 йилдаги келишувга тўғридан тўғри зиддир”, дея баёнот берди Ҳиндистон Ташқи ишлар вазирлиги.
Келишувга кўра, ҳар икки давлатнинг ҳарбий ва сувости кемалари халқаро сувларда кўнгилсиз ҳодисаларнинг олдини олиш учун бир-биридан камида уч денгиз мили (5,5 километр) масофа сақлаши шарт. Покистон ҳукумати ва ҳарбийлари ҳолат бўйича дарҳол изоҳ бермади.
Ҳиндистон эса чақиртирилган дипломат орқали Покистон томонига бундай ҳодисалар такрорланмаслиги учун икки томонлама келишувларга риоя этиш зарурлигини таъкидлади. Шунингдек, Ҳиндистоннинг Исломободдаги дипломатига ҳам Покистон Ташқи ишлар вазирлигига худди шундай эътироз билдириш топширилган.
Ҳиндистон ва Покистон бир-бирининг пойтахтларида элчиларга эга эмас. 2019 йилдаги Кашмир можароси сабаб дипломатик муносабатлар даражаси пасайтирилган. Ўшандан бери дипломатик миссияларни муваққат ишлар вакиллари бошқариб келмоқда.
Икки давлат ўртасидаги сўнгги тўқнашув
2025 йил апрель ойида Ҳиндистоннинг Жамму ва Кашмир минтақасидаги Паҳалгам шаҳри яқинида содир этилган терактдан кейин давлатлар ўртасига муносабат ёмонлашганди. Ўшанда “Қаршилик фронти” жангарилари сайёҳларга ҳужум қилиб, 26 кишининг ўлимига сабаб бўлган. Ҳиндистон ҳужумда Покистонни айблаган, расман Исломобод ҳужумда иштирок этмаганини айтиб, айбловни рад этган. Кескинлик давомида Ҳиндистон Покистон билан 1960 йилдаги муҳим сув шартномасини тўхтатган ва ягона қуруқликдаги чегара ўтиш пунктини ёпган.
