Покистон 27 апрель куни Афғонистон шарқидаги Кунар вилоятига авиазарба берди. Оқибатда камида тўрт нафар тинч аҳоли вакили ҳалок бўлди, яна 70 га яқин киши жароҳатланди. Бу ҳақда “Толибон” матбуот котиби ўринбосари Ҳамтулла Фитрат баёнотига таяниб Аmu TV хабар берди.
Зарбалар вилоятдаги бир нечта ҳудудга, жумладан, вилоят маркази Асадобод шаҳри ва Маногай туманининг айрим қисмларига берилган. Ҳамтулла Фитратнинг сўзларига кўра, яраланганлар орасида 30 нафарга яқин талаба бор. Шунигдек, аёллар ва болалар ҳам ҳодисадан жабр кўрган.
Маҳаллий вақт билан соат 14:00 атрофида бошланган ҳужумлар оқибатида Сайид Жамолиддин Афғон университетининг Таълим факультети биноси ва одамларнинг яшаш уйлари зарар кўрган.
“Толибон” ҳужумларни уруш жинояти деб атади. Улар Покистонни тинч аҳоли ва таълим муассасаларини нишонга олишда айбламоқда. Покистон расмийлари бир неча кунлик танаффусдан сўнг қайта бошланган ушбу зарбалар юзасидан ҳозирча изоҳ бермади.
Афғонистон ва Покистон чегарасида кескинлик яна авж олган. 26 апрель оқшомидан бошлаб жанглар кучайди. Хусусан, Қандаҳор вилоятининг Спин Болдак туманида “Толибон” кучлари ва Покистон қўшинлари ўртасида бир неча бор тўқнашувлар содир бўлди.
Вазиятнинг ёмонлашиши апрель ойи бошида Хитойда ўтказилган музокаралардан сўнг юз бермоқда. Чегарадаги кескинликни пасайтиришга қаратилган бир ҳафталик музокаралар аниқ натижасиз якунланган. Асосий низоли масалалар ҳал этилмай қолган.
Икки томон ўртасидаги чегара орти зўравонликлари икки ойдан ортиқ вақтдан бери давом этмоқда. Покистон “Таҳрики Толибон Покистон” (ТТП) жангарилари Афғонистон ҳудудидан туриб ҳаракат қилаётганини даъво қилади. “Толибон” эса бу айбловларни рад этиб келади.
БМТ тинч аҳоли орасида қурбонлар сони ортиб бораётганидан огоҳлантирди. Ташкилот маълумотларига кўра, охирги тўқнашувларнинг дастлабки икки ҳафтасида Афғонистон шарқида 70 дан ортиқ тинч аҳоли вакили ўлдирилган.
Энг мудҳиш воқеалардан бири 16 март куни содир бўлган. Ўшанда Покистоннинг Омид реабилитация марказига берган зарбалари оқибатида 269 киши ҳалок бўлган.
