Шри Ланкада ҳакерлар Молия вазирлигининг компютер тизимларига бузиб кириб 2,5 миллион долларни ўғирлади. Бу ҳақда ББC хабар берди.
Маблағ Австралияга тўланиши керак бўлган икки томонлама қарзнинг бир қисми бўлиб, 2025 йил сентябрь ойида тўланиши керак эди. Расмийларга кўра, киберҳужум январь ойида содир бўлган, бироқ тафсилотлар энди маълум бўлмоқда.
“Шри Ланка тегишли тўловларни амалга оширган бўлса-да, кибержиноятчилар аралашиб, маблағларни мақсадли қабул қилувчи ўрнига бошқа банк ҳисоб рақамларига йўналтириб юборган”, деди Молия вазирлиги котиби Ҳаршана Сурияпперума.
Ҳолат юзасидан Давлат қарзини бошқариш идорасининг тўрт нафар юқори лавозимли ходими ишдан олинган. Ҳакерлар маблағни қандай ўғирлагани аниқ эмас, бироқ терговчилар улар давлат қарзини тўлаш жараёнида электрон почта орқали юборилган тўлов кўрсатмаларига аралашган деб ҳисобламоқда.
Шри Ланка расмийлари 2,5 миллион доллар йўқолганини Австралиядаги кредитор тўлов келиб тушмаганини билдиргач аниқлаган. Молия вазири ўринбосари Анил Жаянтҳа Фернандонинг сўзларига кўра, жиноят кўлами ҳакерлар Ҳиндистонга юборилиши керак бўлган навбатдаги тўловни ҳам ўзгартиришга уринганида ойдинлашган.
Расмийлар назорат механизмлари қандай ишламай қолганини ва маблағларни қайтариш эҳтимоли бор-йўқлигини ўрганмоқда. Ушбу киберҳужум тўрт йил аввал валюта захиралари тугаши оқибатида оғир иқтисодий инқирозни бошдан кечирган ва эндигина тикланаётган Шри Ланка учун яна бир зарба бўлди. Ўша пайтда Коломбо 46 миллиард доллар миқдоридаги ташқи қарз бўйича дефолт эълон қилган.
Ҳукумат озиқ-овқат, ёқилғи ва дори-дармон импортини молиялаштира олмаган, бу эса танқислик ва кенг кўламли норозилик намойишларига олиб келган. Натижада 2022 йил июлида ўша пайтдаги президент Готабая Ражапакса лавозимидан кетганди.
Австралиянинг Коломбодаги олий комиссари Метю Дакворт мамлакат ўзига тегишли тўловлардаги номувофиқликлардан хабардор эканини айтди.
“Шри Ланка ҳукумати бу масалани ўрганмоқда ва терговга кўмаклашаётган Австралия расмийлари билан ҳамкорлик қилмоқда”, деди Дакворт.
Киберҳужум Шри Ланка Марказий банки ва Молия вазирлиги 2026 йил бошида аҳолини киберфирибгарликлардан огоҳ этиш кампаниясини бошлаган пайтга тўғри келди.
