Сербия Исроил билан ҳамкорликда жанговар дронлар ишлаб чиқаради. Бу ҳақда мамлакат президенти Александр Вучичнинг баёнотига таяниб The Washington Post хабар берди.
Болқон минтақасидаги ушбу давлат ўз ҳарбий салоҳиятини ва қурол-яроғ ишлаб чиқариш ҳажмини оширишга интилмоқда.
“Дунёнинг ушбу қисмида энг яхши дронларга эга бўламиз”, деди Сербия президенти.
У дронлар арзон бўлмаслиги, бироқ зирҳли техникаларни йўқ қилишда жуда самарали эканини таъкидлади. Ишлаб чиқариш тафсилотларига эса аниқлик киритилмади.
“Биз Исроил каби дронларни қандай ишлаб чиқаришни билмаймиз. Мен қўшма ишлаб чиқариш билан фахрланаман, ҳамкорлигимиз 50 га 50 бўлади”, деди Александр Вучич.
У лойиҳа Сербияга инновациялар олиб кириши ва келажакда бу соҳада ишлай оладиган мутахассисларни тайёрлашга хизмат қилишини айтди. Сербиянинг BIRN нашрига кўра, мамлакатнинг “Югоимпорт СДПР” давлат қурол-яроғ ишлаб чиқарувчиси Исроилнинг Elbit Systems компанияси билан ҳамкорликда дрон заводини очади. Келажакда унинг 51 фоиз улуши Исроил компаниясига тегишли бўлади.
Вучич ҳукумати ўз армиясини кучайтиришга катта эътибор қаратмоқда
Сербия 2024 йилда ўз ҳарбий авиациясини модернизация қилиш мақсадида Францияда ишлаб чиқарилган 12 та Rafale самолётига буюртма берди. Мамлакат Хитой ва Россиядан ҳарбий техника харид қилди. У расмий равишда Европа Иттифоқига аъзо бўлишга интилишига қарамай, Пекин ва Москва билан яқин алоқаларни сақлаб қолмоқда. Сербия 1999 йилда Косоводаги урушни тўхтатиш мақсадида НАТО томонидан амалга оширилган бомбардимонларни ҳисобга олиб, альянсдан ташқарида қолишини билдирган.
