Италиянинг Тоскана вилоятидаги вино заводи омборидан қиймати 5 миллион евро бўлган 30 минг шиша вино ўғирлаб кетилди. Бу ҳақда “Financial Times” хабар берди.
Қайд этилишича, воқеа жорий йилнинг 4 октябрига ўтар кечаси мамлакатнинг энг қадимий вино ишлаб чиқарувчи корхоналаридан бири – Marchesi Antinori омборида содир бўлган. Ниқоб таққан етти нафар эркак сигнализацияни ўчириб, Tignanello, Solaia ва Guado al Tasso винолари солинган қутиларни иккита катта юк машинасига ортиб, ўғирлаб кетган.
Ўғрилик завод хориждаги мижозларга энг қиммат виноларидан иборат катта партияни жўнатишга тайёрланаётган пайтда содир этилган. Нашрга кўра, бир шиша ўғирланган винонинг чакана нархи 150 евродан 500 еврогача туради.
Маълум қилинишича, ўғрилик кузатув камераларига тушган. Полиция тергов олиб бормоқда, бироқ гумонланувчилар ҳозирча қўлга олинмаган.
“Биз ҳали ҳам виноларни топишга умид қиляпмиз. Иккита юк машинаси шунчаки изсиз йўқолиб қолмайди. Бу винолар жуда қимматли. Бундай катта миқдордаги маҳсулотни бутун дунё бўйлаб эътиборни тортмасдан қандай сотиш мумкинлигини тасаввур қила олмайман”, деган Marchesi Antinori бош директори Ренцо Котарелла.
Компания вакилларига кўра, бу Италия тарихидаги энг йирик вино ўғриликларидан бири. “Financial Times” нашри эса ҳодиса ўғирланган шишалар сони ва қиймати жиҳатидан нафақат Италияда, балки дунёда ҳам энг йириги бўлиши мумкинлигини ёзган.
Италияда вино ўғриликлари аввал ҳам кузатилган. Бироқ жиноятчилар одатда Мишлен юлдузларига эга ресторанлар ва қимматбаҳо винолар сақланадиган ертўлаларни нишонга олган. 2026 йил ёзидан бошлаб эса ўғрилар вино ишлаб чиқарувчи корхоналарга ҳам ҳужум қила бошлаган. Жумладан, Banfi di Montalcino вино заводининг Пьемонт вилоятидаги омборидан 3 минг шиша Alta Langa виноси ўғирланган. Компания вакиллари жиноятчилар шишаларни синчковлик билан танлагани ва нима қилаётганини яхши билганини таъкидлаган.
Сентябрь ойида эса тўрт нафар ўғри Conterno Fantino вино заводидан 3 минг шиша Barolo виносини ўғирлаган.
