Италияда 57 ёшли эркак ўлган онасининг пенсиясини уч йил давомида ноқонуний ўзлаштириб келгани маълум бўлди. Аёлнинг паспорт маълумотлари муддати ўтгач, ўғил онасининг қиёфасида янги паспорт расмийлаштириш учун ҳужжат топширишга борган. Бу ҳақда CNN хабар берди.
Эркак ўлган онасининг кийимларини кийиб, бўяниб ва парик тақиб, ўзини марҳума сифатида кўрсатган. У аслида 2022 йилда 82 ёшида вафот этган Гразиэлла Далл’Оглионинг ўғли ҳисобланади. Эркак аввал ҳамшира бўлиб ишлаган, ҳозирда эса ишсиз.
Италияда шахсни тасдиқловчи ҳужжатларни янгилаш фақат шахснинг ўзи иштирокида амалга оширилади. Шу боис эркак онасининг гувоҳномаси муддати тугагач, ўзи идорага келган. Бироқ ҳужжатларни расмийлаштирган ходим шубҳаланиб, бу ҳақда ҳуқуқ-тартибот органларига хабар берган.
Кузатув камераларидаги тасвирларда эркак онаси қиёфасида машинада келгани акс этган. Ҳолбуки, аёл ҳайдовчилик гувоҳномасига эга бўлмаган. Полиция воқеа жойида эркакни қўлга олган.
Шундан сўнг ҳуқуқ-тартибот ходимлари аёл яшаган манзилга бориб, унинг мумиёланган жасадини кир ювиш хонасидаги шкафдан топган. Марҳума махсус қопларга ўралган ҳолда сақланган бўлган.
Гумонланувчи жасадни яшириш, давлатни алдаш, ўзини бошқа шахс сифатида кўрсатиш ва сохта ҳужжатлар тайёрлашда айбланмоқда. Шунингдек, у жасаднинг чиришини секинлаштириш мақсадида шприц ёрдамида суюқликларни чиқариб ташлаганликда ҳам гумон қилинмоқда. Ўлим сабабини аниқлаш учун суд-тиббий экспертиза тайинланди.
Ҳозирда эркак маҳаллий қамоқхонада сақланмоқда, прокуратура эса экспертиза натижаларини кутмоқда. Полиция маълумотларига кўра, Италияда ўлимни яшириб, марҳуманинг номидан нафақа олиш ҳолатлари тез-тез учрайди. Мамлакатда ҳар йили ўнлаб шахслар марҳумлар номидан пенсия олиш учун фирибгарлик қилганликда қўлга олинади. Чунки айрим ҳолларда аҳоли реестрлари ва давлат хизматлари ўртасидаги маълумот алмашинуви кечикади ва ўлим ҳақидаги расмий хабар берилмагунича тўловлар давом этаверади.
