Бельгиянинг шимоли-шарқидаги НАТОга қарашли Клейне Брогел авиабазаси яқинида номаълум дронлар парвози кузатилди. Бу ҳақда Deutsche Welle хабар берди.
Маҳаллий аҳоли 4 ноябрь куни кечқурун авиабаза атрофида камида олтита дронни кўрган. Тасдиқланмаган маълумотларга кўра, Клейне Брогел авиабазаси Европада Америка ядро қуроллари сақланадиган жойлардан бири ҳисобланади. Полиция иккита дронни қайд этган.
“Вазият ҳамон ноаниқ, чунки ҳатто ҳарбийлар ҳам бу дронларни аниқлай олмаган”, дея таъкидлади маҳаллий ҳокимият вакиллари.
Зарурат туғилганда дронларни тутиб олиш учун воқеа жойига полиция вертолёти чақирилган. Бундан аввал ҳам авиабаза устидан номаълум дронлар парвози қайд этилганди. Жумладан, 2 ноябрь куни Клейне Брогел авиабазаси устида икки марта номаълум дронлар кузатилган.
“Улар ҳарбий объект устидан юқори баландликда учиб ўтган ва бу одатий парвоз эмасди, уларнинг аниқ мақсади НАТО базаси бўлган”, деб таъкидлади Бельгия мудофаа вазири Тео Франкен.
- Бельгия аэропортида парвозлар учун чеклов
4 ноябрь куни кечқурун дронлар ҳақидаги хабарлар туфайли Брюссел аэропортида икки марта парвозлар тўхтатилди. Бу маҳаллий вақт билан тахминан соат 20:00 ва 22:00 да содир бўлди. Belga агентлиги маълумотларига кўра, чекловлар Леж шаҳри аэропортида ҳам жорий этилди.
Шунга ўхшаш воқеалар Бельгияда сўнгги ҳафталарда бир неча бор қайд этилган. Октябрь ойи охирида Леж жанубидаги Марш-ан-Фамен ҳарбий базаси устида икки марта дронлар кузатилган. Октябрь ойи бошида Бельгия шарқидаги Элзенборн ҳарбий полигони устида 15 та дрон кўринганди.
Номаълум дронлар узоқ вақтдан бери Европанинг бир қатор мамлакатлари, жумладан Германия, Дания ва Норвегиядаги ҳарбий объектлар ва аэропортлар яқинида учиб юргани кузатилмоқда. Ушбу ҳодисалар туфайли аэропортлар рейсларни қабул қилиш ва жўнатишни вақтинча тўхтатган. Дронлар учирилиши ортида айнан ким турганини расмийлар ҳали аниқламади, аммо Россия гумонланмоқда.
