Бугун, 15 декбрь куни Россия 130 та Украина дрони йўқ қилинганини маълум қилди. Дронлар ҳужуми оқибатида Москвадаги айрим аэропортлар фаолияти вақтинча тўхтатилди. Бу ҳақда “Regnum.ru” хабар берди.
Қайд этилишича, Россия Мудофаа вазирлиги ҳаво мудофааси бўлинмалари бир кеча давомида 130 та Украина дронини уриб туширганини маълум қилган. Улардан 15 таси Москва томон йўналган бўлган.
Москва мэри Сергей Собянин эса 15 декабрь тонгида пойтахтга йўналтирилган яна тўртта дрон йўқ қилинганини, ҳозирда фавқулодда хизматлар ҳодиса жойида иш олиб бораётганини билдирди.
Украина томонидан Москвага дронлар юборилиши тез—тез кузатилиб, бу ҳолатлар Россия пойтахти аэропортлари иш фаолиятига салбий таъсир кўрсатиб келмоқда.
Россия авиация назорати органи – Росавиация Москвадаги Домодедово ва Жуковский аэропортлари, шунингдек, Шереметьево аэропорти ҳамда мамлакат жанубидаги бир қатор аэропортлар фаолияти вақтинча тўхтатилганини маълум қилди.
Шу билан бирга, Ростов вилояти губернатори вазифасини бажарувчи Юрий Слюсарнинг айтишича, тунда содир бўлган дрон ҳужуми оқибатида электр узатиш линиясига зарар етган.
