АҚШ собиқ вице-президенти Камала Ҳаррис 2028 йил бўлиб ўтадиган сайловда яна президентликка номзодини қўйиши мумкин. Бу ҳақда Axios портали хабар берди.
Йил бошида омма эътиборидан четда бўлган Ҳаррис сўнгги ҳафталарда бир қатор тадбирларда кўриниш берди. Демократлар буни унинг 2028-йилги кампаниясига тайёргарлик сифатида баҳоламоқда. Ҳаррис 2024-йилги қисқа президентлик кампанияси ҳақида ҳикоя қилувчи “107 кун” номли китобини тарғиб қилиш учун сафарларини кенгайтирди.
2026 йил бошига режалаштирилган ташрифлар орасида праймеризлар учун муҳим бўлган Жанубий Каролина ҳамда Детройт, Жексон (Миссисипи), Мемфис (Теннесси) ва Монтгомери (Алабама) шаҳарлари бор. Ҳаррис аллақачон бир қатор штатларда нутқ сўзлаган ва бу чиқишларида АҚШ собиқ президенти Жо Байден маъмуриятини қўллаб-қувватлашдан чекиниб, демократлар ва республикачиларни танқид қила бошлаган.
“Иккала партия ҳам жамоатчилик ишончини оқлай олмади. Ҳукумат халқ эҳтиёжларини қондира олмайдиган тизим сифатида қабул қилинмоқда… Одамлар мавжуд ҳолатдан тўйган ва ўзгаришлар бўлиши учун тизимни бузишга ҳам тайёр. Биз кўпчиликни муваффақияцизликка олиб келган нотўғри тизимни соғинишга йўл қўя олмаймиз”, деган у ва президент Трамп каттароқ муаммонинг “симптоми” эканини айтган.
Нутқдан сўнг айримлар Ҳарриснинг 2028-йилги сайловларда номзод бўлишини хоҳлашини билдирган. У “келажак” ҳақида гапирганида залда кимдир “Сен!” деб бақирган. Манбага кўра, Ҳаррис қора танли сайловчилар орасида катта қўллаб-қувватловга эга бўлиб, бўлажак сайловда энг машҳур потенциал номзодлардан бири бўлиб қолмоқда.
