Афғонистон билан чегара яқинида юз берган тўқнашувларда 5 нафар покистонлик аскар ва 25 нафар жангари ҳалок бўлди. Бу ҳақда Покистон армиясига таяниб, Al Jazeera хабар берди.
Маълум қилинишича, жангарилар 24-25 октябрь кунлари Афғонистондан Покистоннинг шимоли-ғарбий чегарасидаги Куррам ва Шимолий Вазиристон ҳудудларига ўтишга уринган. Покистон “Толибон” ҳукуматини “Афғонистон ҳудудидан фаолият юритаётган қуролли гуруҳларга қарши чора кўрмаётганликда” айблаган.
“Толибон” жангариларга бошпана бериш ҳақидаги айбловларни рад этиб келади. Улар Покистоннинг ҳарбий операциялари Афғонистон суверенитетини бузаётганини таъкидламоқда.
Икки мамлакат вакиллари октябрь ойи бошида ўз қуролли кучлари ўртасидаги тўқнашувлардан сўнг можаронинг такрорланишини олдини олиш учун Истанбулда учрашди. Бу “Толибон” 2021-йилда Кобулни эгаллаганидан бери юз берган энг жиддий чегара тўқнашувлари эди.
Покистон мудофаа вазири Хаважа Муҳаммад Асиф ўт очишни тўхтатиш тартиби ўзгармаганини ва Кобул тинчликдан манфаатдор кўринишини айтди.
Бироқ агар “Толибон” билан музокаралар муваффақияцизликка учраса, очиқчасига урушга киришамиз, деган эди у.
Покистон ҳарбийлари дам олиш кунларидаги тўқнашувларда иштирок этганларни “Фитна ал-Хвориж” деб атайдиган ташкилот аъзолари деб таърифлади. Бу атама гўёки хорижий ҳомийлар томонидан қўллаб-қувватланган мафкуравий руҳдаги қуролли гуруҳларга нисбатан ишлатилади.
