Россия Аэрокосмик кучлари реактив двигателга эга авиабомбалардан фойдалана бошлади. Улар каттароқ жанговар радиусга эга. Бироқ украиналикларда уларни уриб тушириш учун етарли салоҳият бор. Бу ҳақда Украина ҳарбий ҳаво кучлари матбуот хизмати раҳбари Юрий Игнат маълум қилди.
Унинг сўзларига кўра, реактив двигатель билан жиҳозланган бошқарилувчи авиабомбаларнинг жанговар радиуси анча юқори. Улар Россия ҳудудидан учирилган тақдирда, Украинанинг Одесса, Миколаев ва Полтава вилоятларигача етиб келади. Игнатнинг айтишича, Россия бу қуроллардан вақти-вақти билан фойдаланиб, Украина ҳаво мудофаасининг жанговар имкониятларини синовдан ўтказмоқда.
Фото: United24
Одеса вилоятига берилган сўнгги зарбаларни изоҳлар экан, ҳарбий ҳаво кучлари сўзчиси бу турдаги бомбалар катта хавф туғдирмаслигини, уларни ҳаво мудофаа тизимлари билан уриб тушириш мумкинлигини таъкидлади.
“Бу Su-34 самолётидан учириладиган бомбанинг худди ўзгинаси. Унинг парвоз параметрлари қанотли ракетаникига ўхшаш, бу эса уни ҳаво мудофаа тизимлари ёрдамида уриб тушириш имконини беради. Кеча ‘Жануб’ ҳаво қўмондонлиги узоқ масофали иккита бошқариладиган бомбанинг уриб туширилганини тасдиқлади; мутахассислар уларнинг турини аниқламоқда. Учинчи бомба эса очиқ майдонга тушди”, деган Игнат.
Украина Бош разведка бошқармасига кўра, Россия универсал режалаштириш ва тузатиш модулига “Гром-1” ёки “Гром-2” авиабомбаларини серияли ишлаб чиқара бошлаган. Улар 150—200 км масофадан ишга туширилади. Шу боис бу турдаги бомбаларни ташувчи самолётларга катта хавф туғилмайди.
