Тошкент вилоятининг “Навоий” ва “Ойбек” чегара божхона постларида заргарлик буюмларини яширинча олиб киришга уринган шахс аниқланди. Бу ҳақда Божхона қўмитаси хабар берди.
Аниқланишича, “Навоий” чегара божхона постида пиёда сифатида кириб келган фуқаролардан бири инсон тана аъзоларини сканерловчи қурилма кўмагида кўздан кечирилганда, оёқларининг болдир қисмига 190 гр оғирликдаги заргарлик буюмларини боғлаб олиб киришга урингани аниқланган.
Шунингдек, “Ойбек” чегара божхона постида ҳам йўловчи “body scanner” қурилмаси кўмагида текширилганда ўзидан “жонли контейнер” сифатида фойдаланиб, ички аъзоларига салкам 181 гр тилла тақинчоқларни яширгани маълум бўлган. Хабар берилишича, ушбу постда кузатилган яна бир ҳолатда йўловчилардан бири салкам 58 гр заргарлик буюмларини божхона назоратидан яшириб олиб ўтаётган вақтида тўхтатиб қолинган.
Ҳар учала ҳолатда аниқланган заргарлик буюмларининг жами қиймати дастлабки ҳисоб-китобларга кўра 525 млн сўмни ташкил қилган. Ҳозирда барча ҳолатлар юзасидан божхона текширувлари олиб борилмоқда.
