2026 йил 1 август ҳолатига кўра, Ўзбекистон иқтисодий тарихида илк бор пул массаси энг юқори қиймат — 434,5 трлн сўмга етди. Бу ҳақда Марказий банк маълумот берди.
Иқтисодиётда пул массаси (банклардаги жами депозитлар ва муомаладаги нақд пуллар) бир йил олдингига нисбатан қарийб 118,8 трлн сўмга ёки 37 фоизга ортган.
Миллий валютадаги пул массаси умумий миқдорнинг 83 фоиздан ортиқ қисмини ташкил этмоқда.
Жорий йил июнда депозитлар ва нақд пуллар қиймати биринчи марта 400 трлн сўмдан ошганди (411,4 трлн сўм). 2025 йил июнидаги кўрсаткич эса 300 трлн сўм эди. Яъни охирги уч йилда мамлакатда пул массаси икки баравардан кўпроқ ўсди.
Август ойи бошида муомаладаги нақд пуллар миқдори ҳам рекордни янгилаб, жами 76,3 трлн сўмга етган. Мазкур кўрсаткич бир йил аввалгидан 16,4 трлн сўм кўп.
Марказий банк илк бор эълон қилган пул массаси миқдори 2013 йил 1 февралда 24,4 трлн сўмни ташкил қилган. 2024 йил бошига келиб, бу кўрсаткич 242,2 трлн сўмга етди. Яъни 11 йил давомида қарийб 10 бараварлик ўсиш қайд этилган.
