Дунёда мол гўшти нархи тарихий чўққига чиқиб, биринчи марта бир килограмм учун 7 доллардан ошди. Бу ҳақда “РИА Новости” хабар берди.
Маълумотларга кўра, мол гўшти нархи беш ойдан буён ўсиб бормоқда. Октябрь ойида нарх сентябрга нисбатан 3 фоизга, 2024 йилнинг шу даврига нисбатан эса 17 фоизга ошган. Натижада бир кило гўштнинг нархи 7,1 долларга етиб, 1960 йилдан буён кузатилган энг юқори кўрсаткични қайд этган.
Мутахассислар бу ҳолатни сут саноатидаги рақобат билан изоҳламоқда. Сут маҳсулотлари нархининг ошиши гўшт етиштириш учун боқиладиган қорамоллар сони камайишига олиб келган. АҚШда мол гўшти импортига бўлган талабнинг ошгани ҳам нархга таъсир кўрсатган. Дунёнинг энг йирик ишлаб чиқарувчиси ва истеъмолчиси ҳисобланган АҚШ 2025 йилда ўз ишлаб чиқариш ҳажмининг камайишига дуч келди.
АҚШ Қишлоқ хўжалиги вазирлиги прогнозларига кўра, 2025 йилда мол гўшти ишлаб чиқариш 12,2 миллион тонна, экспорт эса 1,2 миллион тоннани ташкил этади. Бу 2024 йилга нисбатан мос равишда 1 ва 11 фоизга кам. Асосий сабаб — ички бозорда озуқа танқислигидир.
Бундан ташқари, бу йил Европа Иттифоқида (−1 фоиз) ва Аргентинада (−3 фоиз) ҳам ишлаб чиқаришнинг қисқариши кутилмоқда. Бу ҳудудларда рентабелликнинг пастлиги ҳамда ноқулай об-ҳаво шароитлари чорва сонининг камайишига олиб келган.
