Украинанинг Киев вилоятида оғир аҳволга тушиб қолган 19 нафар ўзбекистонлик ватанга қайтарилди. Бу ҳақда “Дунё” ахборот агентлиги хабар қилди.
Аввалроқ Киев вилоятида Ўзбекистон фуқаролари қул каби ишлатилаётгани тўғрисида хабар қилинганди. Уларнинг соғлиғи аниқланиб, маҳаллий шифохоналардан бирига жойлаштирилган.
Фуқаролар Украинадан хавфсиз чиқиб кетиши учун музокаралар натижасида барча 19 нафар фуқарога “жабрланувчи” мақоми расман берилди, бу уларга нисбатан ушбу давлат қонунчилиги бўйича ҳар қандай санкциялар қўлланилишини бутунлай истисно қилди.
Жорий йил 28 октябрь куни Ўзбекистон фуқаролари Киевдан Кишинёвга автотранспортда етказилди. Молдовада бўлиш вақтида улар хавфсиз яшаш шароитлари, озиқ-овқат ва зарур ёрдам таъминланди. 2 ноябрь куни эса фуқаролар Кишинёв—Истанбул—Урганч йўналиши бўйича парвоз қилиб, 3 ноябрь куни Ўзбекистонга етиб келган.
