Давлат хавфсизлик хизмати Қорақалпоғистон Республикаси бўйича бошқармаси ва Ички ишлар вазирлиги тезкор ходимлари ҳамкорлигида гиёҳвандлик воситаларининг ноқонуний айланмасига қарши тезкор тадбир ўтказилди.
Тадбир давомида Нукус шаҳрида 1972 йилда туғилган, аввал судланган фуқаро 9 грамм опий моддасини Шуманай туманида яшовчи, 1965 йилда туғилган шахсга 4 млн сўмга сотаётган вақтида ушланган. Шунингдек, сотувчининг ёнидан қўшимча 5 грамм опий моддаси ҳам аниқланган.
Текширувлар жараёнида ушбу шахс гиёҳванд моддани 1981 йилда туғилган, илгари ҳам гиёҳвандлик билан боғлиқ жиноят учун судланган танишидан олгани маълум бўлган. Хўжайли туманида давом эттирилган тезкор тадбирда ушбу шахс 20 грамм опийни 8 млн сўмга сотаётган вақтида қўлга олинган.
Бундан ташқари, унинг ёнидаги сумкадан 1 килограмм 176 грамм опий моддаси мусодара қилинган. Аниқланишича, мазкур гиёҳвандлик воситаси Тожикистон Республикасидан контрабанда йўли билан олиб келинган.
Ҳозирда уч нафар гумондорга нисбатан Жиноят кодексининг 28, 246-моддаси 2-қисми ва 273-моддаси 5-қисми билан жиноят иши қўзғатилган. Уларга нисбатан қамоқ эҳтиёт чораси қўлланган.
Қонунчиликка кўра, мазкур турдаги жиноятларни содир этган шахслар 10 йилдан 20 йилгача озодликдан маҳрум этилиши мумкин.
