“Ҳайвонлар шаҳри” анимацион фильмининг иккинчи қисми Walt Disney Animation студияси тарихидаги энг юқори даромад келтирган мультфильм сифатида рекорд ўрнатди.
Маълумотларга кўра, ноябрь ойининг ўрталарида кинотеатрларга чиққан картина жаҳон прокатида жами 1,49 миллиард доллар даромад келтирди. Шундан мультфильм Хитой бозорида 500 миллион доллардан ортиқ, АҚШда эса 333 миллион доллар йиғишга муваффақ бўлди. Натижада “Ҳайвонлар шаҳри 2” аввалги етакчи анимацион фильм бўлган “Музюрак–2”ни қарийб 400 миллион долларлик фарқ билан ортда қолдирди.
Қайд этилишича, “Ҳайвонлар шаҳри 2”дан ташқари, 2025 йилда прокатда атиги икки мультфильм миллиард доллардан ортиқ даромадга чиққан. Улардан бири — “Лило ва Стич” мультфильмининг адаптацияси бўлиб, у 1,03 миллиард доллар фойда келтирган. Иккинчиси эса Хитойда ишланган “Нечжа 2” номли анимацион фильм бўлиб, прокатдаги даромади 2,2 миллиард долларни ташкил этган.
“Ҳайвонлар шаҳри 2” сюжетига кўра, воқеалар марказида яна бир бор жасур полиция қуёнчаси Жуди Ҳоппс (Жиннифер Гудвин овоз берган) ва айёр, бироқ келишган тулки Ник Уайлд (Жейсон Бейтман овоз берган) туради. Бу сафар улар шаҳарга яқинда келган сирли қаҳрамон — судралиб юрувчи махлуқ билан боғлиқ жумбоқни ҳал қилиш учун бирлашади. Ушбу янги образга машҳур актёр Ке Хуэй Куан овоз берган.
Мутахассисларнинг фикрича, “Ҳайвонлар шаҳри 2”нинг ушбу муваффақияти бир нечта омиллар билан боғлиқ: биринчи қисмнинг оммабоплиги, оилавий томоша учун мос сюжет, кучли маркетинг кампанияси ва Disney’нинг глобал дистрибюторлик тармоғи. Шунингдек, фильмнинг бир вақтнинг ўзида кўплаб давлатларда кенг экранларда намойиш этилиши ҳам даромаднинг тез ошишига хизмат қилди.
Бундан аввал “Ҳайвонлар шаҳри–2” фильми режиссёрлари Байрон Ҳовард ва Жаред Буш Хитойнинг Weibo ижтимоий тармоғида франшиза мухлислари билан жонли мулоқот давомида франшизанинг учинчи қисми устида ишлар аллақачон бошланганини маълум қилган эди.
