Франция ҳукумати давлат хизматчиларига видеомулоқот учун Google Meet, Zoom ва Microsoft Теаms каби АҚШ платформаларидан фойдаланишни тақиқлайди. Бу ҳақда Politico хабар берди.
Қарор ҳукумат ўз фаолиятини маҳаллий технологик платформага ўтказиши доирасида қабул қилинди. Европада АҚШ хизматларига қарамлик борасидаги хавотирлар кучаяётгани ҳам бунга сабаб бўлмоқда.
Бош вазир идораси амалдорлар учун Visio номли видеомулоқот дастуридан фойдаланишни талаб қилувчи кўрсатма тайёрлаган. Ушбу дастур Франциянинг Идоралараро рақамли бошқармаси (Dinum) томонидан ишлаб чиқилган. У Outsale компаниясининг инфратузилмасида ишлайди.
Dinum вакилининг айтишича, кўрсатма яқин кунларда расман эълон қилинади. Қарор 25 январь куни Давлат ислоҳоти вазири Давид Амиэлининг баёноти ортидан қабул қилинди. У 2027-йилгача Франция маҳаллий видеомулоқот платформасига тўлиқ ўтишни режалаштираётганини айтганди.
Франция 2025 йил ёзда расмийларга WhatsApp ва Telegramдан воз кечиб, фақат давлат хизматчилари учун мўлжалланган Tchap тезкор хабар алмашиш хизматидан фойдаланишни буюрган эди.
Ҳозирда Visio дастуридан 40 минг нафар ходим фойдаланади. Шу жумладан, аксарият вазирликлар ва уларнинг айрим тузилмалари, масалан, Франция Миллий илмий тадқиқотлар маркази ҳам фойдаланувчилар қаторига киради.
Dinum фойдаланувчилар сонини 250 минг нафарга етказишни режалаштирган. Идора платформага ўтиш жараёнига риоя этилишини назорат қилади ва яқин ойларда давлат интернет тармоғи орқали бошқа видеодастурлардан фойдаланишни чеклаши ёки блоклаши ҳам мумкин.
Маълумот ўрнида, Францияда 15 ёшгача бўлганлар учун ижтимоий тармоқларни тақиқлаш кўриб чиқилмоқда. Президент Эммануэл Макрон ушбу тартибни 2026-йилнинг сентябрь ойида, яъни янги ўқув йили бошланишига қадар кучга киритишни буюрган.
“Фарзандлар ва ўсмирлар мияси сотилмайди. Уларнинг туйғулари Америка платформалари ёки Хитой алгоритмлари томонидан манипуляция қилиниши учун сотувга қўйилмаган”, деган Франция президенти.
Франциянинг ушбу ташаббуси Европадаги умумий тенденциянинг бир қисмидир. Австралия 2025-йилда дунёда илк бор 16 ёшгача бўлган болалар учун ижтимоий тармоқларни тақиқлаган эди. Шунингдек, Данияда ҳам 15 ёшдан кичиклар учун ижтимоий тармоқларни блоклаш бўйича келишувга эришилган (қонун 2026 йил ўрталарида кучга кириши мумкин). Қўшни Қозоғистонда ҳам тегишли тақиқдан фойдаланиш кўриб чиқилмоқда.
