АҚШ Молия вазирлигининг Ташқи активларни назорат қилиш бошқармаси (OFAC) Ўзбекистондаги Datavice компанияси ва яна бир қатор ташкилотларни Россиянинг IT-сектори билан алоқадорликда айблаб, “қора рўйхат”га киритди. Бу ҳақда АҚШ Молия вазирлиги сайтида хабар берилди.
Кеча, 19 ноябрь куни Америка ҳукумати киберҳужумларда иштирок этган ва амал қилаётган чекловларни четлаб ўтишда ёрдам берган компаниялар ва жисмоний шахсларга нисбатан янги санкцияларни тасдиқлаган. Бу қарор Америка «душманларига» санкциялар орқали қарши туриш (CAATSA) қонуни ва Украина ҳудудидаги ҳаракатларга жавобан жорий этилган чоралар доирасида қабул қилинган. Чекловларнинг асосий мақсади – рақамли технологиялар ёрдамида санкцияларни четлаб ўтишнинг олдини олиш.
Жорий йилнинг июль ойида Тошкент шаҳрида ташкил этилган Datavice компанияси 31 июлдан буён IT-Парк резиденти ҳисобланади. Orginfo маълумотларига кўра, Максим Макаров компания таъсисчиси, раҳбари ва бош ҳисобчиси сифатида қайд этилган. Корхонанинг устав фонди 24 миллион сўмни ташкил қилади.
Санкция қўлланилган шахс ва корхоналарнинг АҚШ юрисдикциясидаги барча активлари блокланади. Уларга нисбатан ҳар қандай молиявий операциялар тақиқланади, бу талабни бузганларга эса иккиламчи санкциялар қўлланилиши мумкин.
Янгиланган рўйхатга ўзбекистондаги Datavice билан бирга қуйидаги компаниялар ҳам киритилган: Media Land (Россия), ML.Cloud (Россия), Kirishi (Россия), Media Land Technology ( Россия), Hypercore ( Буюк Британия), Smart Digital Ideas Doo Cyber4 ( Сербия).
Шунингдек, ушбу ташкилотлар билан боғлиқ беш нафар россиялик фуқаро ҳам чекловлар остига олинган. Вашингтон технологик сектор ҳарбий мақсадлар ва халқаро санкцияларни четлаб ўтиш учун фойдаланилаётганини таъкидлаб, босимни давом эттиришини билдирган.
