Бухорода фуқарони Умра сафарига юборишни ваъда қилиб, ундан 1500 доллар талаб қилган шахс қўлга олинди. Бу ҳақда вилоят Ички ишлар бошқармаси хабар берди.
Қайд этилишича, Қашқадарё вилоятида рўйхатдан ўтган масъулияти чекланган жамиятнинг Бухоро шаҳридаги филиалида оператор бўлиб ишлаган, 2004 йилда туғилган фуқаро Умра зиёратига боришни режалаштирган шахсларнинг ишончига кириб, ноқонуний даромад олишни мақсад қилган.
У тегишли ваколатга эга бўлмаган ҳолда Бухоро шаҳрида яшовчи аёлга етти кунлик Умра сафарини ташкил қилиб беришини айтган ва бунинг эвазига 1500 АҚШ доллари талаб қилган.
Тезкор тадбир давомида гумонланувчи ўзи ишлайдиган офис биносида олдиндан махсус ишлов берилган 1500 АҚШ доллари ҳамда 850 минг сўм пул маблағларини олаётган вақтида ашёвий далиллар билан ушланган.
Ҳозирда мазкур ҳолат юзасидан унга нисбатан Ўзбекистон Республикаси Жиноят кодексининг 168-моддаси (фирибгарлик) билан жиноят иши қўзғатилган. Тергов ҳаракатлари давом этмоқда.
