Фарғона ва Сирдарё вилоятидаги музейлардан 500 дан ортиқ экспонат йўқолди. Бу ҳақда Маданий мерос агентлиги хабар берди.
Қайд этилишича, республикадаги давлат музейларида олиб борилаётган хатлов ишлари давомида “Қўқон” давлат музей-қўриқхонаси ва унинг филиаллари ҳамда Сирдарё вилояти тарихи ва маданияти давлат музейи фондларида музей ашёлари камомади аниқланган.
Хусусан, “Қўқон” давлат музей-қўриқхонаси ва унинг филиаллари, жумладан, Ғафур Ғулом номидаги Қўқон адабиёт музейида 500 га яқин, Сирдарё вилояти тарихи ва маданияти давлат музейида эса 16 дона фонд ҳисобида мавжуд бўлган экспонатларнинг мавжуд эмаслиги хатлов комиссияси томонидан қайд этилган.
Билдирилишича, аниқланган ҳолатлар юзасидан қонунчиликда белгиланган тартибда ҳуқуқий баҳо бериш ва тегишли чоралар кўриш учун ҳужжатлар прокуратура органларига тақдим этилган.
“Мазкур хатлов ишлари Ўзбекистон Республикаси Президентининг “Музейларда хизматлар соҳасини ривожлантириш чора-тадбирлари тўғрисида”ги 261-сон қарори ҳамда Вазирлар Маҳкамаси ва Бош прокуратуранинг 2022 йил 16 июлдаги 65-сонли қўшма йиғилиш баёни ижроси доирасида республика музейлари фондларидаги музей ашёлари ва коллекцияларининг сақланиш ҳолатини ўрганиш мақсадида босқичма-босқич амалга оширилмоқда”, дейилад хабарда.
