АҚШнинг Вашингтон штатида ҳарбий қирувчи самолёт қулаб тушди. Ҳалокатдан олдин унинг учувчиси катапульта қилишга улгурди. Бу ҳақда NBC News хабар берди.
Қайд этилишича, ҳодиса кеча, 13 июнь куни кундузи Вашингтон штатидаги Римрок кўли яқинида содир бўлган. Ҳарбийларнинг маълумотларига кўра, F/A-18 Hornet қирувчи самолёти режали машғулот парвозини амалга ошираётган вақтда ҳалокатга учраган.
Учувчи хавфсиз тарзда катапульта қилишга муваффақ бўлган. Самолёт қулаганидан кейин маҳаллий хизматлар ходимлари уни топган. Ҳарбий хизматчи енгил жароҳатлар билан шифохонага етказилган.
Ҳалокатдан сўнг самолёт бўлаклари қуруқ ўт-ўланларнинг ёниб кетишига сабаб бўлган. Воқеа жойига ёнғин хавфсизлиги бўлинмалари ва АҚШ Ўрмон хизмати ходимлари етиб борган. Қутқарувчилар яқин атрофда жойлашган биноларни ҳимоя қилиш чораларини кўрган ва ёнғин оқибатларини бартараф этиш ишларини давом эттирган.
АҚШ Денгиз пиёдалари корпусининг маълум қилишича, ҳодисага авиацион носозлик сабаб бўлган бўлиши мумкин, бироқ аниқ ҳолатларга ойдинлик киритилиши керак. Тергов ҳаракатлари бошланган, у бир неча ой давом этиши мумкин.
Ҳалокат содир бўлган ҳудуд Сиэтлдан тахминан 200 километр жануби-шарқда, Оканоган-Уэнатчи миллий ўрмони ҳудудида жойлашган.
