Кеча, 15 сентябрь куни АҚШнинг Лос-Анжелес округида вертолёт қулаш оқибатида 3 киши ҳалок бўлди. Бу ҳақда Лос-Анжелес ёнғин хизмати маълум қилди.
Вертолёт соат 19:00 га яқин Чатсворт ҳудудидаги 2 та тижорий бино ўртасига қулаган. Мазкур ҳудуд Лос-Анжелес шаҳри чеккасида жойлашган.
Қайд этилишича, ҳалок бўлганлардан бири воқеа жойи яқинидан ўтиб кетаётган йўловчи бўлган. Бу ҳақда Лос-Анжелес ёнғин хизмати вакили Бранден Силверман ҳалокат жойи яқинида журналистларга маълум қилган.
Унинг сўзларига кўра, вертолёт бортида қанча одам бўлгани ва уларнинг аҳволи қандай экани дастлаб аниқ бўлмаган. Шунингдек, Силверман ҳалокатга учраган ҳаво кемаси янгиликлар учун фойдаланиладиган вертолёт бўлган ёки бўлмаганини тасдиқлашдан бош тортган. Бироқ “NBC4 Los Angeles” телеканали бошловчиси жонли эфир вақтида телеканал ўз вертолётларидан бири билан алоқани йўқотганини айтган. Бироқ у телеканал фақат янгиликлар учун фойдаланиладиган вертолёт қулаганини тасдиқлай олишини билдирган.
Ёнғин хизмати бироз вақт ўтиб берган хабарида ҳалок бўлганлар сони 3 нафарга етганини маълум қилган. Ҳодиса оқибатида келиб чиққан ёнғин 4 та автомобиль ва 2 та юк контейнерини зарарлаган. Ҳалок бўлган яна 2 киши ҳақида қўшимча маълумот берилмаган.
Бундан ташқари, 1 киши шифохонага олиб кетилган. Унинг аҳволи ҳозирча номаълум.
