Сирдарё вилоятида ноқонуний балиқ овлаш ҳолати аниқланиб, табиатга 500 миллион сўмдан ортиқ зарар етказилгани маълум бўлди. Бу ҳақда Экология ва иқлим ўзгариши миллий қўмитаси хабар берди.
Маълум қилинишича, Давлат экологик назорат инспекцияси, Сирдарё сув ҳавзасини назорат қилиш бўлими, вилоят Экология бошқармаси ҳамда вилоят Давлат хавфсизлик хизмати ва Ички ишлар органлари ҳамкорлигида навбатдаги рейд тадбири ўтказилган.
Рейд давомида Сайхунобод тумани “Фаровон” маҳалласи ҳудудидаги Шўразак зовурида икки нафар фуқаро — Ш.Ж. ва С.X. томонидан ноқонуний усулда балиқ овлангани аниқланган. Улар электр қармоқ ёрдамида 46 та балиқ тутгани маълум бўлган.
Ҳолат юзасидан тегишли далолатнома расмийлаштирилиб, ноқонуний овланган балиқлар ҳамда ов қуроллари: резина қайиқ, эшкаклар, аккумулятор, насос ва электр қармоқ вақтинча олиб қўйилган.
Қайд этилишича, мазкур ҳуқуқбузарлик оқибатида қатор қонунлар талаблари бузилган. Натижада табиатга 519 миллион 120 минг сўм миқдорида зарар етказилгани аниқланган. Тўпланган ҳужжатлар ҳолатга ҳуқуқий баҳо бериш ва тегишли чоралар кўриш учун Сирдарё вилояти прокуратурасига юборилди.
