Россия Қуролли кучлари сафида ёлланма хизматчи сифатида Украина ҳудудидаги уруш жараёнларида қатнашган фарғоналик эркакка суд ҳукми ўқилди.
Суд ҳужжатларида маълум бўлишича, 1997-йилда Риштон туманида туғилган А.А. 2024-йилнинг ноябрь ойида Москва шаҳрига бориб, ошхоналардан бирида онаси Г.М. билан биргаликда иш бошлаган. Бироқ январь ойи охирларида онасининг соғлиғидаги муаммолар сабабли Россиядаги танишларидан қарз олиб, уни Фарғонага қайтариб юборган.
Орадан ҳеч қанча ўтмасдан, ишхонада тожикистонлик ҳамкасби билан уришиб қолиши ортидан ишдан бўшаган. Шундан сўнг, тахминан, 1 ҳафта давомида иш излаб юрган вақтида полиция ходимлари ушлаб, унга нисбатан тегишли ҳужжатлар расмийлаштириб, ички ишлар бўлимида ушлаб туришган.
“Менга Сергей деган ходим 5 минг рубль жарима қўлланилганини, агар тўламасам, қўйиб юбормаслигини айтди. Ёнимда пулим бўлмагани учун ўша ерда ўтиравердим. Шунда Сергей яна сўроқ-саволга тутиб, нега Подмосковеда юрганимни сўраганида иш қидираётганимни айтдим. У эса бир жой борлигини, яхши ойлик тўлашларини, ҳаттоки ҳамма ҳужжатларни ўзлари тайёрлаб беришини билдириб, бир аёлнинг рақамини бериб, чиқариб юборди”, дея кўрсатув берди у.
У бўлимдан чиқиб рақами берилган аёл билан боғланганини сўзлаб берди.
“Орадан 2 кун ўтиб, айтилган жойга бордим. У ерда уч нафар аёл мени суҳбатдан ўтказиб, ҳарбий қисмда ошпаз ёрдамчиси сифатида ишга олинишимни айтишди. Ҳужжатларни имзолашдан аввал узоқ ўйландим. Бироқ онамнинг касаллиги, катта қарзларим борлиги, агар депорт қилишса, Фарғонага бориб иш тополмаслигимни ўйлаб, барчасига рози бўлдим”, деди судланувчи.
Шундан сўнг А.А. Россия Федерацияси Мудофаа вазирлиги ҳарбий хизматчилари кузатуви остида ўзига олдиндан таниш бўлмаган 60 нафар шахс билан биргаликда Воронеж вилояти Богучар аҳоли пунктида жойлашган ҳарбий қисмда 14 кун давомида жанговар тайёргарликдан ўтган. Унга рақамли жетон ҳамда ҳарбий ҳаракатларда фойдаланиш учун “АК-12” русумли ўқотар қуроли бириктирилган. Март ойида шартнома имзолаган бошқа шахслар билан бирга ҳарбий юк машиналарида Украина ҳудудига кириб, уруш жараёнларида қатнашган.
Украинанинг Зелёная долина номли ҳудудига учиб келган кассета-ракеталарининг портлаши ва унинг парчалари атрофга учиши оқибатида А.А.нинг ўнг қўли елка, билак ҳамда тирсак бўғими соҳасидан жароҳатланган. У бир ой давомида ҳарбий госпиталда даволанган. Тузалганидан сўнг тахминан тўрт ойдан ортиқ ўзига бириктирилган ҳарбий қисмдан 5 км узоқликдаги бошқа бир ҳарбий қисмга озиқ-овқатларни пиёда етказиб бериш билан шуғулланган.
2025 йил 17 июль куни ҳарбий қисм командири томонидан имзоланган меҳнат таътили билетини олиб, 21 июль куни Москва—Тошкент йўналишидаги рейс билан Ўзбекистонга қайтиб келган. Шундан кейин у Фарғона вилояти ИИБ томонидан чақирилган ва жиноят иши қўзғатилган.
Жиноят ишлари бўйича Фарғона туман суди 2026-йилнинг январида фуқаро А.А.ни Жиноят кодексининг 154-моддаси 1-қисмидаги жиноятни содир этган деб топди. Унга нисбатан ЖКнинг 57-моддасини қўллаб, 3 йил озодликдан маҳрум қилиш жазоси тайинланди.
