АҚШ Яқин Шарққа қўшимча ҳаво ҳужумидан мудофаа воситаларини юбормоқда. Бу ҳақда АҚШ Мудофаа вазирлиги маълумотлари, парвозлар мониторинги ва сунъий йўлдош тасвирларига таяниб, The Wall Street Journal (WSJ) газетаси хабар берди.
Бу тизимлар Эронга зарба берилган тақдирда Исроил, араб иттифоқчилари ва Америка қўшинларини ҳимоя қилишга қаратилган. Америка расмийларига кўра, агар президент Трамп ҳозироқ ҳужум қилишга буйруқ берса, АҚШ қуролли кучлари Эронга “чекланган авиаҳужумлар” уюштириши мумкин.
Бироқ Дональд Трамп ҳарбийларга тайёрлашни топширган “қатъий ҳужум” Эроннинг мутаносиб жавобини келтириб чиқариши мумкин. Шу боис АҚШ Исроил ва ўз қўшинларини ҳимоя қилиш учун ишончли ҳаво ҳужумидан мудофаа тизимларига эга бўлиши зарур, деди WSJ билан суҳбатлашган расмийлар.
Пентагон ҳозирда Яқин Шарқ бўйлаб АҚШ ҳарбий базаларига THAAD ракетага қарши мажмуалари ҳамда Патриот зенит-ракета комплексининг қўшимча батальонларини жойлаштирмоқда. Бу жараён Иордания, Кувайт, Баҳрайн, Саудия Арабистони ва Қатарни ҳам қамраб олган.
Мақолада қайд этилишича, THAAD жойлаштирилиши — бу АҚШ эҳтимолий можарога тайёргарлик кўраётганининг айниқса яққол белгиси, чунки бу тизимлар америкаликларда чекланган миқдорда мавжуд.
Оятуллоҳ Хоманаий АҚШ Эронга зарба берган тақдирда “минтақавий уруш” билан таҳдид қилди
Эрон олий раҳнамоси оятуллоҳ Али Хоманаий 1 февраль куни Вашингтон жанговар ҳаракатларни бошласа, “бу сафар минтақавий уруш бўлиши»ни айтди.
“Биз ташаббускор эмасмиз ва ҳеч қандай давлатга ҳужум қилишни мақсад қилмаймиз. Аммо Эрон халқи унга ҳужум қилган ёки таҳдид қилган ҳар қандай кишига қаттиқ зарба беради”, деди Эроннинг 86 ёшли маънавий етакчиси давлат телевидениеси эфирида.
Бу баёнот Хоманаийнинг сўнгги вақтлардаги энг очиқ таҳдиди сифатида баҳоланмоқда. Айни пайтда Эрон президенти Масъуд Пезешкиён АҚШ билан можарони тинч йўл билан ҳал этиш тарафдори бўлди. У Миср президенти Абдулфаттоҳ ас-Сиси билан телефон орқали мулоқотда дипломатик жараёнларни бошлаш зарурлигини таъкидлади.
“Эрон ҳеч қачон урушга интилмаган ва ҳозир ҳам интилмаяпти. Ислом Республикаси уруш Эронга ҳам, АҚШга ҳам, минтақага ҳам фойда келтирмаслигига ишонади”, деган у.
