Россия армияси “Донбасс ёнилғи-энергетика компанияси” (ДТЭК)дан кончиларни олиб кетаётган автобусга зарба берди. Оқибатда 12 киши ҳалок бўлди, камида 16 киши жароҳатланди. Бу ҳақда ДТЭК бош директори Максим Тимченко маълум қилди.
Унинг айтишича, россияликлар ишини тугатиб уйига қайтаётган тинч аҳолини нишонга олган. Тимченко буни мутлақо фуқаролик объектига қарши қилинган, асоссиз “террорчилик ҳужуми” деб атади.
Шунингдек, ушбу ҳужум Россиянинг кенг кўламли босқини бошланганидан бери компания учун энг катта йўқотиш эканини ва бу ДТЭК тарихидаги энг қора кунлардан бири бўлганини билдирди.
“ДТЭК кончилари бўлган автобусга Россия дронлари ҳужум қилгани ҳақида даҳшатли хабар олдим. Камида 12 киши ҳалок бўлди, яна 16 киши яраланди. Фожиа тафсилотлари ҳали аниқлаштирилмоқда, аммо ҳозирнинг ўзидаёқ ишонч билан айтиш мумкинки,бу оқлаб бўлмайдиган, фақат фуқаролик объектига қаратилган террорчилик ҳужумидир”, дея таъкидлади Тимченко.
Ҳалок бўлган ва жабрланганларнинг оилаларига зарур ёрдам кўрсатилади.
“Янгиланган маълумотларга кўра, 12 киши ҳалок бўлган. Ярадорлар бор. Шунчаки ишлаб, уйига қайтаётган одамлар эди. Ҳалок бўлганларнинг оила аъзолари ва яқинларига чин дилдан ҳамдардлик билдираман”, деди Украина жамоалар ва ҳудудларни ривожлантириш вазири Алексей Кулеба.
