Нью Йорк товар биржасида (CОМEХ) олтин нархи 21-октябрдаги савдоларда 6 фоизга тушиб, бир троя унцияси учун 4100 долларга баҳоланди. Бу ҳақда “РБК” хабар берди.
Бу олтин нархининг 2013-йилдан бери бир кунлик энг катта пасайишидир. Кумуш ҳам арзонлашган ва Newmont каби тоғ-кон компанияларининг акциялари кескин тушиб кетган. Олтин унцияси 4393 долларгача кўтарилиб, янги рекорд ўрнатганидан бир кун ўтиб пасайиш кузатилди. Bloomberg агентлиги бу пасайишни инвесторларнинг фойда олиш учун олтин сотиши билан изоҳлади.
Тошкент вақти билан соат 19:45 га келиб, пасайиш 6,12 фоизгача тезлашди, котировкалар бир троя унцияси учун минимал 4093 долларга етди. АҚШ доллари курсининг яқинда тикланиши олтин котировкаларига ҳам босим ўтказган бўлиши мумкин.
“Вазият бироз хавотирли тус олмоқда. Асосий сабаб — кучли ортиқча харид ҳолати, яъни нархларнинг тез суръатда ўсиши. Олтиннинг атиги олти ҳафта ичида 1000 долларга қимматлашгани нархлар ҳаддан ташқари ошиб кетганидан далолат беради. Биз стратосфера даражасидамиз”- дейди МКС Памп компанияси таҳлилчиси Никки Шилс.
Аввалроқ АҚШ-Хитой муносабатларидаги кескинлик кучайиб бораётгани ва АҚШ Федерал захира тизими йил охиригача пул-кредит сиёсатини юмшатишда давом этишига умид қилинаётгани фонида олтин ва кумуш нархлари рекорд даражага кўтарилган эди. Нархлар “сакраши” август ойининг ўрталаридан бери давом этмоқда.
16-октябрь куни олтин нархи тарихда биринчи марта бир унция учун 4300 доллардан ошди. Кумуш нархи ҳам тарихий максимумни янгилади. 20-октябрь куни олтин котировкалари бир унция учун 4398 долларгача кўтарилди. 21-октябрда олтин нархи сезиларли даражада пасайишни бошлади ва 22-октябрь ҳолатига кўра бир унциянинг нархи 4005 долларгача тушди.
Ўзбекистонда ҳам олтин қуймалари нархи пасайтирилди :
5 грамм — 8 млн 326 минг сўм;
10 грамм — 16 млн 652 минг сўм;
20 грамм — 33 млн 305 минг сўм;
50 грамм — 83 млн 262 минг сўм;
100 грамм — 166 млн 523 минг сўм.
